يران ا ق ش- تى يادرولىق كەلىسسوزدى بۇزدى دەپ ايىپتادى
استانا. KAZINFORM - يراننىڭ سىرتقى ىستەر ءمينيسترى ابباس اراگچي يراننىڭ يادرولىق وتىن وندىرۋگە قۇقىعى بار دەپ مالىمدەدى جانە امەريكا قۇراما شتاتتارىن «ماكسيماليستىك تالاپتار مەن ارانداتۋشىلىق ريتوريكا» كەسىرىنەن كەلىسسوزدى بۇزدى دەپ ايىپتادى، دەپ حابارلايدى Anadolu.
X الەۋمەتتىك جەلىسىندەگى پاراقشاسىندا جاريالانعان مالىمدەمەسىندە اراگچي بۇقارالىق اقپارات قۇرالدارى ارقىلى كەلىسسوزدەردىڭ نەگىزگى بولىگىن تالقىلاۋدان اۋلاق ەكەنىن ايتتى. ءبىراق «يراننىڭ يادرولىق باعدارلاماسى تۋرالى وتىرىكتىڭ قايتالانۋى نەگىزگى فاكتىلەردى وزگەرتپەيدى» دەپ اتاپ ءوتتى.
مينيستر ا ق ش- تىڭ تەگەرانعا بەيبىت يادرولىق باعدارلاما ءۇشىن ۋراندى بايىتۋ قاجەت ەمەس دەگەن پىكىرىنە تۇسىنىكتەمە بەرە وتىرىپ، يراننىڭ يادرولىق قارۋدى تاراتپاۋ تۋرالى شارتتىڭ (ي ا ق ت ش) نەگىزىن قالاۋشى ەلدەرىنىڭ ءبىرى رەتىندە يادرولىق وتىن ءوندىرىسىنىڭ تولىق تسيكلىنە قۇقىعى بار ەكەنىن ەسكە سالدى.
- يادرولىق قارۋدان تولىق باس تارتا وتىرىپ، ۋراندى بايىتاتىن ياقتش- عا مۇشە ەلدەر بار. يراننان باسقا مۇنداي مەملەكەتتەر ازيا، ەۋروپا جانە وڭتۇستىك امەريكادا ورنالاسقان، دەدى ول.
اراگچي ا ق ش- تى اگرەسسيۆتى ۇستانىمنان ساقتاندىردى.
- ماكسيماليزم مەن ارانداتۋشىلىق تابىسقا جەتۋ مۇمكىندىگىن جوققا شىعارۋدان باسقا ەشتەڭەگە اكەلمەيدى. سەنىمدى جانە تۇراقتى كەلىسىمگە كەلۋگە بولادى. ول ءۇشىن مىقتى ساياسي ەرىك پەن ءادىل كوزقاراس قاجەت، - دەدى ول.
