يراك تۇرمەسىندەگى قازاقستاندىق ايەلدەردى قايتارۋعا نە كەدەرگى –س ءى م جاۋابى
استانا. KAZINFORM - ءماجىلىستىڭ جالپى وتىرىسىنان كەيىن ب ا ق وكىلدەرى سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋلليننەن يراك تۇرمەسىندە 8 جىلدان بەرى وتىرعان قازاقستاندىقتاردىڭ تاعدىرى تۋرالى سۇرادى.
- قۇقىق قورعاۋشىلار مەن تۋىستارى بىزگە جۇگىندى. ءبىز بۇل ماسەلەمەن 8 جىل بويى اينالىسپادىق دەپ ايتا المايمىن. سەبەبى ولاردىڭ سول جەردە وتىرعانىن جاقىندا عانا بىلدىك. بىرىنشىدەن، سەگىز ادامنىڭ بارلىعى قازاقستان ازاماتى ەكەنى ناقتى راستالعان جوق. ءارتۇرلى مالىمەتتەر بار، ءبىر دەرەككوزدە ەكى ادام قازاقستاننىڭ ازاماتى، قالعاندارى كورشىلەس ەلدەردىڭ ازاماتتارى ەكەنى ايتىلعان. باستى پروبلەما ولاردىڭ سوت شەشىمى بويىنشا ءومىر بويىنا باس بوستاندىعىنان ايىرىلعانىندا. وزدەرىڭىز بىلەسىزدەر، سوت بيلىگىنە ارالاسۋعا بولمايدى. قازاقستان سوت شەشىمىنە ىقپال ەتە المايدى. دەگەنمەن، ءبىز يراك تاراپىمەن ولاردى قايتارۋ، رەادميسسيا جانە باسقا دا كەلىسىمدەر بويىنشا جۇمىس جۇرگىزىپ جاتىرمىز، - دەدى اقان راحمەتۋللين باسپا ءسوز ءماسليحاتىندا.
مينيستر ورىنباسارىنىڭ مالىمدەۋىنشە، اتالعان ماسەلەنى شەشۋ، وتە ۇزاق پروتسەسس.
- سوندىقتان ءبىز يراك تاراپىمەن بەلسەندى تۇردە جۇمىس ىستەپ جاتىرمىز. قازىر ناقتى قاشان جانە قانداي شارالار قولعا الىناتىنىن ءدوپ باسىپ ايتا المايمىن. ءۇمىت بار، قازىر ەكى جاعداي بولىپ تۇر. ءبىرىنشىسى، ولار يراك سوتىنىڭ شەشىمىمەن تەرروريزمگە جاردەمدەسكەنى ءۇشىن ءومىر بويىنا باس بوستاندىعىنان ايىرىلعان. سوت شەشىمىنە ىقپال ەتۋ، وتە قيىن ماسەلە. ەكىنشىسى، ءبىز ەگەر كەلىسىم جاساي الساق، ايەلدەردى قازاقستانعا جەتكىزىپ، جازاسىن ەلىمىزدە وتەۋىنە مۇمكىندىك جاساۋعا بولادى. ءبىراق، تەك قازاقستان ازاماتتارى بولسا عانا، - دەيدى ول.
ەسكە سالا كەتسەك، 2019-جىلى مەملەكەت باسشىسى قاسىم-جومارت توقايەۆتىڭ تاپسىرماسى بويىنشا جۇزەگە اسىرىلعان گۋمانيتارلىق اكسيا ناتيجەسىندە يراك تۇرمەسىندە ءوز انالارىنىڭ جانىندا جاتقان 14 قازاقستاندىق بالا قايتارىلدى.
2023-جىلى ەلىمىزدىڭ سىرتقى ىستەر مينيسترلىگى يراكتا سوتتالعان قازاقستان ازاماتتارىنا قاتىستى كەلىسسوز جالعاساتىنىن مالىمدەدى.
سونداي-اق ەلىمىزدىڭ سىرتقى ىستەر مينيسترلىگى يراك تۇرمەسىندە وتىرعان قازاقستاندىق ايەلدەردىڭ جاعدايى تۋرالى ايتتى.
