يراك تۇرمەسىندەگى 6 ايەلدى قازاقستانعا قايتارۋعا نە كەدەرگى

استانا. KAZINFORM - سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين يراكتىڭ تۇرمەسىندەگى قازاقستاننىڭ 6 ازاماتىن (ايەلدەر) قايتارۋ پروتسەسىنە قاتىستى تۇسىنىك بەردى.

- بۇل جاعداي كۇردەلى، سەبەبى يراكپەن ارادا ءوزارا قۇقىقتىق كومەك جانە سوتتالعانداردى بەرۋ تۋرالى كەلىسىم بەكىتىلمەگەن. بۇل قۇجات جوباسى قازىر ءالى دە پىسىقتالىپ جاتىر. ءبىز ءتيىستى جوبانى ازىرلەپ، يراك جاعىنا جولدادىق. ولار ونى قاراستىرىپ وتىر، - دەدى ا. راحمەتۋللين پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، يراكتا تەررورزيم بويىنشا ايىپتالعان ادامدار نەمەسە لاڭكەستىككە كومەكتەسكەندەر ءومىر بويىنشا باس بوستاندىعىنان ايىرىلادى.

- سوندىقتان يراك جاعىمەن جۇمىستى جالعاستىرىپ جاتىرمىز. سوتتالعانداردى بەرۋ تۋرالى قۇجاتتىڭ بولماۋىنان ولاردى قايتارۋ پروتسەسى باياۋ ءجۇرىپ وتىر، - دەدى ءمينيسترىنىڭ ءبىرىنشى ورىنباسارى.

ەسكە سالساق، بيىل ءساۋىر ايىندا باس پروكۋروردىڭ ورىنباسارى عالىمجان قويگەلديەۆ يراك تۇرمەسىندە وتىرعان قازاقستان ازاماتتارىن قايتارۋعا قاتىستى كەلىسسوز ءجۇرىپ جاتقانىن ايتتى.

اۆتور

رۋسلان عابباسوۆ