يراك ب ۇ ۇ- عا يزرايل يرانعا شابۋىل جاساۋ ءۇشىن ونىڭ اۋە كەڭىستىگىن پايدالاندى دەپ شاعىمداندى

استانا. KAZINFORM - يراك رەسپۋبليكاسى ب ۇ ۇ باس حاتشىسى انتونيۋ گۋتەرريش پەن بۇكىلالەمدىك ۇيىمنىڭ قاۋىپسىزدىك كەڭەسىنە يزرايلدىڭ يرانعا سوققى بەرۋ ءۇشىن يراكتىڭ اۋە كەڭىستىگىن پايدالانۋىنا بايلانىستى نارازىلىعىن ءبىلدىردى، دەپ حابارلايدى تاسس اقپارات اگەنتتىگى.

«يراك 26-قازاندا يزرايلدىڭ يراك اۋە شەكارالارىن ورەسكەل بۇزعانى جانە يرانعا سوققى بەرۋ ءۇشىن ەلدىڭ اۋە كەڭىستىگىن پايدالانعانىنا بايلانىستى باس حاتشى مەن ب ۇ ۇ قاۋىپسىزدىك كەڭەسىنە رەسمي تۇردە نارازىلىق نوتاسىن جىبەردى»، - دەلىنگەن يراك مينيسترلەر كابينەتىنىڭ باسشىسى مۇحاممەد اس-سۋداني كەڭسەسى Telegram ارناسىندا جاريالانعان قۇجاتتا.

پرەمەر سونداي-اق سىرتقى ىستەر مينيسترلىگىنە «يراك ەگەمەندىگىنىڭ بۇزىلۋىن تالقىلاۋ ءۇشىن ا ق ش- پەن بايلانىسۋدى» تاپسىردى.

يراك ۇكىمەتى «ەلدىڭ اۋە كەڭىستىگىن باسقا مەملەكەتتەرگە، اسىرەسە سىيلاستىق قارىم-قاتىناستا وتىرعان كورشىلەس مەملەكەتتەرگە شابۋىل جاساۋ ءۇشىن پايدالانۋعا جول بەرمەيتىنىن» راستادى.

باعداد «ءارتۇرلى دەڭگەيدە يراكتىڭ ەگەمەندىگىن بۇزۋمەن كۇرەسۋگە» ۋادە بەرىپ، بارلىق تاراپتاردى داۋلاردى «ديالوگ ارقىلى» شەشۋگە شاقىردى.

26-قازاندا يزرايل قورعانىس كۇشتەرى «كوپتەگەن ۇزدىكسىز شابۋىلدارعا» جاۋاپ رەتىندە يرانداعى اسكەري نىساندارعا سوققى بەرەتىنىن جاريالادى. يراننىڭ اۋە قورعانىس كۇشتەرى مالىمدەمەسىندە شابۋىل يلام، تەگەران جانە حۋزەستان پروۆينتسيالارىنداعى اسكەري نىساندارعا جاسالعانى، ءبىراق كەلتىرىلگەن شىعىن شەكتەۋلى ەكەنى ايتىلعان.

بۇل سوققى حاماس، «حەزبوللا» جانە يسلام ريەۆوليۋتسياسى ساقشىلار كورپۋسى (يران قارۋلى كۇشتەرىنىڭ ەليتالىق بولىمشەلەرى) جەتەكشىلىگىندەگى نەگىزگى تۇلعالاردىڭ ولتىرىلۋىنە جاۋاپ رەتىندە يراندىق اسكەريلەر ەۆرەي مەملەكەتىنە جاپپاي زىمىراندىق شابۋىل جاساعان 1-قازانداعى وقيعالارعا جاۋاپ بولدى.

وسىعان دەيىن بۇۇ قاۋىپسىزدىك كەڭەسىنىڭ دۇيسەنبىدە يزرايلدىڭ يرانعا سوققى بەرۋىنە بايلانىستى باس قوساتىنىن حابارلادىق.