يراك ازاماتتىق اۋە كەڭىستىگىنە سالىنعان تىيىمدى ۇزارتپادى
استانا. KAZINFORM - يراكتىڭ اۆياتسيالىق بيلىگى 13-ماۋسىمنان بەرى قولدانىستا بولعان ازاماتتىق ۇشاقتاردىڭ ەل اۋماعى ۇستىنەن ۇشۋىنا تىيىمدى ۇزارتپادى، دەپ حابارلايدى ت ا س س.
- 13-ماۋسىم تۇنىندە ەنگىزىلگەن تىيىم ەندى ۇزارتىلعان جوق، - دەدى اگەنتتىككە سۇحبات بەرگەن ديسپەتچەر.
ونىڭ ايتۋىنشا، جاقىندا ەل اۋماعى ارقىلى كۋۆەيتتەن ءۇشىنشى ەلدەرگە باعىت العان بىرنەشە ترانزيتتىك ۇشاق وتكەن.
ديسپەتچەرلىك قىزمەت قازىرگى ۋاقىتتا باعداد حالىقارالىق اۋەجايىنىڭ تولىق جۇمىسىن قايتا قاشان باستايتىنى تۋرالى ناقتى اقپارات جوق ەكەنىن دە مالىمدەدى.
بۇعان دەيىن Flightradar مونيتورينگتىك ۆەب- سەرۆيسى يراك اۋە كەڭىستىگىنىڭ اشىلعانىن حابارلاعان. سونداي-اق Turkish Airlines كومپانياسىنىڭ باسپا ءسوز حاتشىسى بيليال ەكشي الەۋمەتتىك جەلىدەگى جازباسىندا 25-ماۋسىمنان باستاپ باعداد پەن ەربيل باعىتتارىنا رەيستەردىڭ قايتا جانداناتىنىن ايتقان.
ەسكە سالا كەتسەك، 13-ماۋسىمعا قاراعان ءتۇنى يزرايل يرانعا قارسى اسكەري وپەراتسيا باستاعان بولاتىن. ارادا ءبىر تاۋلىك وتپەي يران دا جاۋاپ شابۋىل جاسادى. 23 -ماۋسىمدا ا ق ش پرەزيدەنتى دونالد ترامپ يزرايل مەن يراننىڭ اتىستى تولىق توقتاتۋعا كەلىسىم بەرگەنىن مالىمدەدى.
يزرايل بيلىگى ا ق ش ۇسىنىسىن قابىلداعانىن جانە العا قويىلعان اسكەري ماقساتتار ورىندالعانىن حابارلادى. يران جاعى يزرايلدى ءبىرجاقتى تۇردە اگرەسسيانى توقتاتۋعا ماجبۇرلەگەنىن ايتىپ، بۇل قاقتىعىستاعى جەڭىسىن جاريالادى.
يراكتىڭ اۆياتسيالىق بيلىگى ازاماتتىق اۆياتسيا ءۇشىن اۋە كەڭىستىگىن جاۋىپ تاستاعانىمەن، كەيبىر رەيستەرگە باسرا قالاسىنىڭ اۋەجايىنا قونۋعا رۇقسات بەرىلگەن. بۇل ءۇشىن ديسپەتچەرلەر پارسى شىعاناعى جاعىنان ەل شەكاراسىنان وتۋگە ارنالعان ەكى اۋە ءدالىزى مەن ەكى باقىلاۋ نۇكتەسىن انىقتاعان. مۇنداي رەيستەر 24-ماۋسىم كۇنى دە ورىندالدى.
