22:25, 19 - قىركۇيەك 2023 | GMT +5
ەير استانا ۇشاقتارى قاراباق اۋماعىن اينالىپ وتۋدە
Air Astana كومپانيا ۇشاقتارى قاراباق اۋماعىن اينالىپ ءوتىپ جاتقانىن مالىمدەدى، دەپ حابارلايدى قازاقپارات.
«قاراباقتاعى تۇراقسىز جاعدايعا بايلانىستى «Air Astana» - نىڭ كومپانيالار توبىنىڭ تۇركياعا، ەۋروپاعا جانە يزرايلگە باراتىن/كەلەتىن رەيستەرى اتالعان اۋماقتى اينالىپ وتۋمەن جۇزەگە اسىرىلىپ جاتىر. اۆياكومپانيا جاعدايدى ءجىتى باقىلاپ وتىر جانە ۇشۋ قاۋىپسىزدىگىنىڭ بارلىق شارالارىن قابىلداۋدا ، - دەلىنگەن كومپانيا مالىمەتىندە.
ەسكە سالايىق، بۇعان دەيىن ازەربايجان رەسپۋبليكاسىنىڭ قورعانىس مينيسترلىگى قاراباق وڭىرىندە جەرگىلىكتى دەڭگەيدە انتيتەررورلىق شارانىڭ جالعاسىپ جاتقانىن مالىمدەگەن ەدى. ال ارمەنيانىڭ سىرتقى ىستەر مينيسترلىگى ازەربايجان تاراپىنىڭ ۇستانىمىن وڭىردەگى جاڭا اسكەري شيەلەنىسكە ديپلوماتيالىق دايىندىق رەتىندە باعالاپ وتىر.
