ۇيقىنىڭ ساپاسىز بولۋىنا نە اسەر ەتەتىنى انىقتالدى
استانا. قازاقپارات - نەگە كەيبىر ادامدار قاتتى ۇيىقتاپ، ال باسقالارى تۇندە بىرنەشە رەت ويانىپ، تاڭەرتەڭ شارشاپ؟ سەبەپ تەك سترەسس نەمەسە ۇيقى الدىندا گادجەت قولدانۋدا عانا ەمەس، باۋىردىڭ جاعدايىندا دا بولۋى مۇمكىن. بۇل تۋرالى پيروگوۆ ۋنيۆەرسيتەتىنىڭ ساراپشىسى اننا تيحوميروۆا ايتىپ بەردى.
- نەلىكتەن باۋىردىڭ ساۋلىعى ۇيقى ساپاسىنا اسەر ەتەدى؟
- باۋىردىڭ ساۋلىعى ۇيقى ساپاسىنا تىكەلەي اسەر ەتەدى جانە بۇل دالەلدى مەديتسينا دەرەكتەرىمەن راستالعان. بۇل اسەر بىرنەشە ناقتى بيولوگيالىق مەحانيزمدەر ارقىلى جۇزەگە اسادى، ال ۇيقىنىڭ بۇزىلۋى باۋىر اۋرۋلارىنىڭ ءجيى كەزدەسەتىن جانە كلينيكالىق ماڭىزدى بەلگىلەرىنىڭ ءبىرى سانالادى.
- باۋىر اعزانىڭ سيركادتىق ىرعاقتارىن رەتتەۋگە قالاي قاتىسادى؟
- باۋىر اعزانىڭ «ىشكى ساعاتىنىڭ»، ياعني سيركادتىق ىرعاقتارىنىڭ جۇمىسىن ساقتاۋدا ماڭىزدى ءرول اتقارادى. باۋىر جاسۋشالارىندا بۇكىل اعزانىڭ سيركادتىق ىرعاقتارىن رەتتەۋگە قاتىساتىن ارنايى رەتسەپتورلار بار. ولار ەنەرگيا الماسۋدى، ماي الماسۋىن جانە ۇيقى ءۇشىن ماڭىزدى - ۇيقى مەن سەرگەكتىك سيكلدەرىنە اسەر ەتەتىن گورمونداردىڭ ءبولىنۋىن رەتتەيدى.
ەگەر باۋىر قىزمەتى بۇزىلسا، مىسالى باۋىردىڭ مايلى اۋرۋى نەمەسە سيرروز كەزىندە، بۇل «رەتتەۋ» مەحانيزمى بۇزىلادى. ناتيجەسىندە سيركادتىق ىرعاقتار ۇيلەسىمسىزدىككە ۇشىراپ، بۇل ۇيقى ساپاسىنىڭ ناشارلاۋىنا جانە كۇندىزگى ۇيقىشىلدىققا اكەلۋى مۇمكىن.
- زەرتتەۋلەر باۋىردىڭ مايلى اۋرۋى بار ناۋقاستاردا قانداي ۇيقى بۇزىلىستارىن انىقتادى؟
- زەرتتەۋلەرگە سايكەس، ناۋقاستاردا تۇنگى ويانۋلار سانى الدەقايدا كوپ بولعان - 8,5، ال ساۋ ادامداردا - 5,5. ۇيىقتاپ كەتكەننەن كەيىنگى سەرگەك ۋاقىت ۇزاقتىعى ولاردا 45,4 مينۋت بولسا، ساۋ ادامداردا - نەبارى 21,3 مينۋت.
ۇيقىنىڭ تيىمدىلىگى، ياعني توسەكتە جاتقان ۋاقىتتىڭ قانشا پايىزى ناقتى ۇيقىعا كەتكەنى، ناۋقاستاردا تومەن بولعان - %86,5، ال ساۋ ادامداردا - %92,8. جالپى ناۋقاس ادامدار شامامەن 6 ساعات ۇيىقتاسا، ساۋ ادامدار 6 ساعات 45 مينۋت ۇيىقتايدى.
بۇل دەرەكتەر باۋىر اۋرۋلارى ۇيقىنىڭ ۇزىك-ۇزىك، ءۇستىرت جانە قىسقا بولۋىنا اكەلەتىنىن كورسەتەدى. پاتسيەنتتەر مۇنى ۇيىقتاپ كەتۋدىڭ قيىنداۋى جانە تاڭەرتەڭ ءوزىن ءالسىز سەزىنۋ رەتىندە بايقايدى.
