ۇيقى رەجيمىن ساقتاعان ادامنىڭ زات الماسىمى جاقسارادى

استانا. KAZINFORM - حالىقارالىق ۇيقى مەديتسيناسى قاۋىمداستىعىنىڭ باستاماسىمەن جىل سايىن دۇنيەجۇزىلىك ۇيقى كۇنى اتالىپ وتەدى، دەپ حابارلايدى انادولى.

مەرەكەنىڭ ماقساتى - دۇرىس ۇيىقتاۋ رەجيمىنىڭ ماڭىزدىلىعىن ەسكە سالۋ. بۇل كۇنى ۇيقىنىڭ بۇزىلۋى جانە ونىڭ ادام دەنساۋلىعىنا اسەرى تۋرالى ءتۇرلى ءىس- شارالار وتەدى.

دۇنيەجۇزىلىك ۇيقى كۇنى ناۋرىزدىڭ ەكىنشى اپتاسىندا، جۇما كۇنى وتكىزىلەدى. بيىل ول كۇن 14-ناۋرىزعا تۋرا كەلدى.

ۇيقى - تەڭدەستىرىلگەن تاماقتانۋ جانە تۇراقتى جاتتىعۋلارمەن قاتار فيزيكالىق جانە پسيحيكالىق دەنساۋلىقتىڭ نەگىزگى ەلەمەنتتەرىنىڭ ءبىرى.

بيىل دۇنيەجۇزىلىك ۇيقى كۇنى «دۇرىس ۇيىقتاۋ رەجيمىن باسىمدىققا اينالدىرايىق» ۇرانىمەن وتكىزىلدى.

ۇيقى الا الماۋ، ءتۇنى بويى ءجيى ويانۋ جانە تاڭەرتەڭ ۇيقىنىڭ قانباۋى سىندى شاعىمدار ۇيقى ساپاسىنىڭ تومەندىگىن ايعاقتايدى. بۇل مالىمەتتەر ا ق ش- تىڭ اۋرۋلاردى باقىلاۋ جانە الدىن الۋ ورتالىقتارىنىڭ (CDC) دەرەكتەرىنەن الىندى.

دۇرىس ۇيىقتاۋ رەجيمى - ادامدى جۇرەك-قانتامىرلار اۋرۋلارىنان، قانت ديابەتىنەن، گيپەرتونيادان جانە ءتىپتى جول-كولىك وقيعالارىنان دا قورعايدى. سونىمەن قاتار، سالماقتى، زات الماسۋ پروتسەسىن، كۇيزەلىسكە توزىمدىلىكتى قالپىنا كەلتىرەدى.

ۇيقى ساپاسىن جاقسارتۋ ءۇشىن، ەڭ اۋەلى، ۇيقى رەجيمىن ساقتاپ، ۇيىقتاۋعا ىڭعايلى جاعداي جاساۋ كەرەك. سونىمەن قوسا ۇنەمى جاتتىعۋ جاساۋدى ادەتكە اينالدىرىپ، تەڭدەستىرىلگەن تاماقتانۋعا بەت بۇرۋ قاجەت. بۇدان بولەك ۇيقىدان كەم دەگەندە جارتى ساعات بۇرىن ەلەكتروندى قۇرىلعىلاردى پايدالانباي، تويىپ تاماقتانۋدان، قۇرامىندا كوفەينى بار سۋسىنداردى ىشۋدەن باس تارتقان ءجون.

دەگەنمەن، دۇنيە جۇزىندەگى كوپتەگەن ادامعا ۇيقىسىزدىق، مازاسىز اياق سيندرومى، ناركولەپسيا (كۇندىزگى ۋاقىتتاعى شامادان تىس ۇيقىشىلدىق جانە ۇيقىسىنىڭ قالىپتان تىس فازاسى) جانە اپنوە ءتارىزدى دياگنوزدار قويىلادى. بۇل بۇزىلىستار ادامعا ساپالى ۇيقى رەجيمىن قالىپتاستىرۋعا كەدەرگى كەلتىرەدى.

2024 -جىلدىڭ قىركۇيەگىندە ا ق ش- تاعى ۇلتتىق ۇيقى قورى ساۋالناما جۇرگىزدى. وعان 1372 ەرەسەك رەسپوندەنت اتسالىستى. ونىڭ ناتيجەسىنە سايكەس ۇيقىنىڭ ساپالى بولۋى كۇندەلىكتى جۇمىستىڭ ءونىمدى بولۋىنا اسەر ەتەتىنىن كورسەتتى.

2024 ResMed جاھاندىق ۇيقىنى زەرتتەۋ جۇمىسىنىڭ ناتيجەسى دە ساپالى ۇيقى مەن جۇمىس ونىمدىلىگىنىڭ ءوزارا بايلانىسى بار ەكەنىن راستادى. ساۋالناماعا 17 ەلدەن (اۋستراليا، برازيليا، قىتاي، فرانسيا، گەرمانيا، گونكونگ، ءۇندىستان، يرلانديا، جاپونيا، كورەيا، مەكسيكا، جاڭا زەلانديا، سينگاپۋر، تايۆان، تايلاند، ۇلىبريتانيا جانە ا ق ش) 36 مىڭ ادام قاتىستى.