ينسۋلت العان ەر ادام تۋعان ءتىلىن ۇمىتىپ قالعان
استانا. قازاقپارات - 67 جاستاعى راحمي كارادەمير تۇركيانىڭ كونيا قالاسىندا ينسۋلت العان سوڭ، كوپ جىل بويى قولدانباعان دات تىلىندە سويلەي باستادى، دەپ حابارلايدى انادولى.
بۇل ونىڭ جاقىندارى مەن مەديتسينالىق قىزمەتكەرلەردى تاڭعالدىردى.
جەتى بالانىڭ اكەسى كارادەمير دانيادا 20 جىل تۇرىپ، 10 جىل بۇرىن تۇركياعا ورالىپ، كونياعا قونىستانعان.
وتكەن اپتادا ول سەلچۋك ۋنيۆەرسيتەتىنىڭ مەديتسينا فاكۋلتەتىنىڭ ورتوپەديا بولىمىندە تىزەسىنە وتا جاساتقان.
وتادان ەكى كۇن وتكەن سوڭ ونىڭ وڭ قولى مەن اياعى السىرەپ، سويلەۋ قابىلەتى بۇزىلعان.
جەدەل دياگنوستيكادان كەيىن ميىنىڭ سول جاعىنداعى ءىرى ارتەريانىڭ ترومبپەن بىتەلگەنى انىقتالدى.
دارىگەرلەر جەدەل انگيوگرافيا جاساپ، ترومبتى الىپ تاستادى.
پروتسەدۋرادان كەيىن نەگىزگى نەۆرولوگيالىق بەلگىلەر تەز جويىلا باستادى. ءبىراق كارادەميردىڭ كوپ جىل بويى قولدانباعان دات تىلىندە سويلەۋى، اسىرەسە ايەلى مەن تۋىستارى ءۇشىن كۇتپەگەن جاعداي بولدى.
تۇرىك تىلىندە سويلەي الماعان كارادەمير كۇيزەلىسكە ءتۇستى، ال بۇرىن ۇمىت بولعان ءتىلدىڭ قايتا ەسكە ءتۇسۋى مامانداردىڭ نازارىن اۋداردى.
سەلچۋك ۋنيۆەرسيتەتى كلينيكاسىنىڭ نەۆرولوگيا كافەدراسىنىڭ مەڭگەرۋشىسى، ترومبەكتوميا جاساعان پروفەسسور گەكحان وزدەمير بۇل سيرەك كەزدەسەتىن قۇبىلىس ەكەنىن اتاپ ءوتتى.
- ءبىز پاتسەنتتىڭ تۇرىك تىلىندە سويلەي المايتىنىن، ءبىراق ۇمىتتى دەپ ەسەپتەلگەن دات تىلىندە ەركىن سويلەيتىنىن بايقادىق. مەديتسينالىق ادەبيەتتە بىرنەشە ءتىل بىلەتىن ادامداردا ينسۋلتتان كەيىن ءبىر ءتىل جوعالىپ، ەكىنشىسى كۇتپەگەن جەردەن بەلسەندى بولاتىن سيرەك جاعدايلار سيپاتتالعان. ينسۋلتتان كەيىن كەم دەگەندە ءبىر تىلدە سويلەۋ قابىلەتى قالسا، بۇل كەيىنگى وڭالتۋ ءۇشىن ماڭىزدى ارتىقشىلىق، - دەپ ءتۇسىندىردى وزدەمير.
