يۋنەسكو شتاب-پاتەرىندە «مەنىڭ اتىم قوجا» فيلمىنىڭ كورسەتىلىمى ءوتتى

پاريج. KAZINFORM - پاريجدەگى يۋنەسكو شتاب-پاتەرىندە «مەنىڭ اتىم قوجا» فيلمىنىڭ كورسەتىلىمى ءوتتى.

ول بەلگىلى جازۋشى، قازاق بالالار ادەبيەتىنىڭ كلاسسيگى بەردىبەك سوقپاقبايەۆتىڭ 100 جىلدىق مەرەيتويىنا ارنالعان ءىس-شارالار اياسىندا ۇيىمداستىرىلدى. بۇل تۋرالى 24.kz سايتى جازدى.

كورسەتىلىم وسى كارتينادا باستى ءرولدى سومداعان نۇرلان سانجاردىڭ بەينە- حابارلاماسىنان باستالدى. ايگىلى كينوكارتينا كورەرمەندەرىنىڭ ىستىق ىقىلاسىنا بولەندى. بىرنەشە ۇرپاقتىڭ سۇيىكتى كارتيناسىنا اينالعان تۋىندى، كەزىندە سالا ماماندارىن تالاي رەت مويىنداتقان. 1967-جىلى كانن فەستيۆالىندە فيلم قازىلار القاسىنىڭ جوعارى باعاسىنا يە بولدى. ايتا كەتەيىك، بەردىبەك سوقپاقبايەۆتىڭ 100 -جىلدىعى جازۋشىنىڭ تۋعان جەرى الماتى وبلىسىندا، سونداي- اق تۇركيا مەن ازەربايجاندا دا اتالىپ ءوتتى.

— فرانسۋز كورەرمەنى بولسىن، باسقا ۇلتتىڭ ازاماتتارى بولسىن ءبارى دە شىن كوڭىلدەرىمەن قىزىعا قارادى. بىرگە كۇلدىك. سول ءار ءتۇرلى ساتتەرىنە، قوجانىڭ قىلىقتارىنا. وسىعان بايلانىستى بەردىبەك سوقپاقبايەۆتىڭ جانە ابدۋللا قارساقبايەۆ تۇسىرگەن فيلمنىڭ تەك قازاققا ەمەس، بۇكىل الەمگە تۇسىنىكتى، جاقىن ەكەنىنە تاعى ءبىر مارتە كوزىمىز جەتتى. سوعان قۋانامىز، - دەدى قازاقستاننىڭ يۋنەسكو-داعى تۇراقتى وكىلى اسقار ءابدىراحمانوۆ.

فيلم كورەرمەندەردىڭ دە كوڭىلىنەن شىقتى.

- ماعان قاتتى ۇنادى. فيلم وتە كۇلكىلى ءارى جاڭالىعى كوپ. وسى ءبىر تۋىندى ارقىلى قازاق ءتىلىن تىڭداپ، ۇلتتىق ويىنداردى تاماشالاي الدىم. اقتاۋعا جاساعان ساپارىمدا ونى ءوز كوزىممەن كورگەن ەدىم. جالپى فيلمنىڭ جاڭا ءتۇرىن كورۋ مەن ءۇشىن وتە قىزىق بولدى.

كاترين، كورەرمەن:

- كەرەمەت! جوعارى باعا بەرەمىن. سان ءتۇرلى اسەر الدىم. ءوزىم ءومىر سۇرمەگەن داۋىرگە دەگەن ساعىنىش سەزىمىن تۋدىرعان سيقىرعا تاپ بولدىم دەسەم ارتىق ەمەس. قازاق كينوسى فەستيۆالىنىڭ بارلىق كورسەتىلىمدەرى وتە تاماشا بولدى، - دەدى كورەرمەندەردىڭ ءبىرى ەليز.

ەسكە سالا كەتەيىك، بۇعان دەيىن پاريجدە بەردىبەك سوقپاقبايەۆتىڭ «مەنىڭ اتىم قوجا» كىتابىنىڭ فرانسۋز تىلىندەگى اۋدارماسى تانىستىرىلعانىن جازعان بولاتىنبىز.