ينفراقۇرىلىمدىق جوبالاردى ينۆەستيتسيالاۋعا «بايتەرەك» حولدينگىنەن 8 تريلليون تەڭگە ءبولىندى - ۇكىمەت
استانا. KAZINFORM - پرەمەر-مينيستر ولجاس بەكتەنوۆتىڭ توراعالىعىمەن «بايتەرەك» ۇلتتىق باسقارۋشى حولدينگى» ا ق ديرەكتورلار كەڭەسىنىڭ وتىرىسى ءوتتى. مەملەكەت باسشىسىنىڭ ەكونوميكانىڭ ناقتى سەكتورىن قارجىلاندىرۋ جونىندەگى تاپسىرمالارىن جۇزەگە اسىرۋعا نازار اۋدارىلدى.
بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.
ديرەكتورلار كەڭەسىنىڭ مۇشەلەرى حولدينگتىڭ بيزنەستى مەملەكەتتىك قولداۋ قۇرالدارىمەن قامتۋدى ارتتىرۋ بويىنشا جۇرگىزىپ جاتقان جۇمىستار تۋرالى حاباردار ەتىلدى.
- بيىلعى ءۇش ايدا ش و ب- تى قولداۋعا باعىتتالعان جالپى سوما 439 ميلليارد تەڭگەنى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا %28 عا ارتىق. قازاقستاننىڭ دامۋ بانكى ارقىلى 292,1 ميلليارد تەڭگەگە 9 ينۆەستيتسيالىق جوبا جانە 9 ەكسپورتتىق وپەراتسيا قارجىلاندىرىلدى. ونەركاسىپتى دامىتۋ قورى 94,5 ميلليارد تەڭگەنى قۇرايتىن 75 ليزينگتىك وپەراتسيا مەن قارىزدار بەرىلدى، - دەلىنگەن حابارلامادا.
اگروونەركاسىپ سەكتورىن دامىتۋ بويىنشا پرەزيدەنت العا قويعان مىندەتتەردى جۇزەگە اسىرۋ ماقساتىندا 3,2 مىڭنان استام ا و ك سۋبەكتىسى مەملەكەتتىك قولداۋمەن قامتىلدى. اۋىل شارۋاشىلىعى تاۋارىن وندىرۋشىلەر 233,4 ميلليارد تەڭگە سوماسىنا قارجىلاندىرىلدى، ونىڭ ىشىندە كوكتەمگى دالا جۇمىستارىنا 134,9 ميلليارد تەڭگە باعىتتالدى. قابىلدانعان شارالاردىڭ ناتيجەسىندە قازاقستاندىق شارۋالار 1,2 مىڭنان استام اۋىل شارۋاشىلىعى تەحنيكاسى مەن جابدىقتارىن ساتىپ الدى.
بيىل ءىرى ونەركاسىپتىك جانە ينفراقۇرىلىمدىق جوبالاردى ينۆەستيتسيالاۋعا العاش رەت «بايتەرەك» ۇ ب ح قۇرالدارى ارقىلى شامامەن 8 تريلليون تەڭگە ءبولىنىپ وتىر. وسى شارالاردىڭ ناتيجەسىندە ەكونوميكانىڭ سەرپىندى ءوسۋى جانە جاڭا جۇمىس ورىندارىن اشۋ كۇتىلىپ وتىر.
- قازىر حولدينگ ىسكە اسىرىپ جاتقان باسىم مىندەتتەردىڭ ءبىرى - ەكونوميكانىڭ ناقتى سەكتورىن قارجىلاندىرۋ. ەكونوميكاعا، ەلىمىزدەگى ءبىرقاتار اسا ماڭىزدى يندۋستريالىق جانە ينفراقۇرىلىمدىق جوبالاردى جۇزەگە اسىرۋعا جوسپارلانعان 8 تريلليون تەڭگەنىڭ يگەرىلۋى قازىردىڭ وزىندە 2 تريلليون تەڭگەگە جاقىنداپ قالدى. قۇرىلىس ماۋسىمى ءوزىنىڭ بەلسەندى كەزەڭىنە ەندى عانا ەنگەنىن ەسكەرسەك، قارقىن جامان ەمەس. مەن «بايتەرەكتىڭ» بارلىق ەنشىلەس قۇرىلىمدارىنىڭ ناقتى، ۇيلەسىمدى جۇمىس ىستەۋ قاجەتتىلىگىنە نازار اۋدارعىم كەلەدى. بۇل مىندەت قازىرگى جاعدايدا وڭاي ەمەس، ءبىراق ءبىز ءوز مىندەتتەمەلەرىمىزدى ورىندايمىز. حولدينگ، مەملەكەت كاپيتالداندىرۋ بويىنشا ءوز مىندەتتەمەلەرىن ورىنداعان جاعدايدا، ەكونوميكانى 8 تريلليون تەڭگەگە قارجىلاندىرۋ جونىندەگى مىندەتتى ورىندايتىنىنا سەنىمدىمىن، - دەپ اتاپ ءوتتى ولجاس بەكتەنوۆ.
ۇلتتىق ەكونوميكا جانە قارجى مينيسترلىكتەرىنە حولدينگتىڭ ۋاقتىلى كاپيتالداندىرىلۋىن قامتاماسىز ەتۋ تاپسىرىلدى.
- تۇرعىن ءۇي ساياساتىن ىسكە اسىرۋ بويىنشا جۇرگىزىلىپ جاتقان جۇمىستارعا ەرەكشە نازار اۋدارىلدى. ماسەلەن، وسى جىلدىڭ 1-توقسانىندا 11,8 مىڭنان استام قازاقستاندىق وتباسى تۇرعىن ۇيمەن قامتاماسىز ەتىلدى. «وتباسى بانك» ا ق 225,2 ميلليارد تەڭگە سوماسىنا قارىز بەردى، «قازاقستاندىق تۇرعىن ءۇي كومپانياسى» 27,6 ميلليارد تەڭگەگە كەپىلدىك بەردى، - دەپ حابارلادى ۇكىمەتتەن.
ديرەكتورلار كەڭەسى وتىرىسىنىڭ قورىتىندىسى بويىنشا ناتيجەلىلىكتى ءارى قاراي ارتتىرۋ ماقساتىندا حولدينگتىڭ ينۆەستيتسيالىق ساياساتىن، سونداي-اق ۇيىمداستىرۋشىلىق جانە قارجىلىق باعىتتاردى جەتىلدىرۋ بويىنشا ءبىرقاتار قۇجات قابىلداندى.
ەسكە سالا كەتەيىك، بۇعان دەيىن ۇكىمەت قايتارىلعان اكتيۆتەر ەسەبىنەن دارىگەرلىك امبۋلاتوريالاردىڭ قۇرىلىسى باستالاتىنىن حابارلاعان بولاتىن.
