ينفلياتسياعا قىسىم جاسايتىن جەكەلەگەن فاكتورلار ساقتالىپ وتىر - ۇلتتىق بانك
استانا. KAZINFORM - ينفلياتسياعا قىسىم جاسايتىن جەكەلەگەن فاكتورلار ساقتالىپ وتىر. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ ايتتى.
«سىرتقى سەكتوردا جاھاندىق ينفلياتسيانىڭ باياۋلاۋ ءۇردىسى بايقالۋدا. بۇل ازىق-تۇلىك باعاسىنىڭ وڭ ديناميكاسىنا، ورتالىق بانكتەردىڭ تەجەۋشى اقشا-كرەديت ساياساتىنا جانە ەنەرگيا باعاسىنىڭ تومەندەۋىنە بايلانىستى. دەگەنمەن، ينفلياتسياعا قىسىم جاسايتىن جەكەلەگەن فاكتورلار دا ساقتالۋدا. قانت باعاسىنىڭ قالىپتى وسۋىمەن قاتار ءداندى داقىلدار مەن ەت قۇنىنىڭ ارزانداۋىنا بايلانىستى الەمدەگى ازىق-تۇلىك باعاسى تومەندەپ كەلەدى. استىق باعاسىنىڭ تومەندەۋى مول ءونىم الۋ ناتيجەسىندە ۇسىنىستىڭ ارتۋىنا بايلانىستى بولدى. سونىمەن قاتار، دامىعان ەلدەردە ورتالىق بانكتەر مولشەرلەمەلەردى وزگەرىسسىز قالدىردى. بۇل ينفلياتسيانىڭ ورنىقتى باياۋلاۋىنا قاراي ءقاۋىپتىڭ بولۋىنا بايلانىستى»، - دەدى تيمۋر سۇلەيمەنوۆ ۇلتتىق بانكتە وتكەن بريفينگىدە.
ونىڭ اتاپ وتۋىنشە، 2023-جىلدىڭ قورىتىندىسى بويىنشا ەۋرووداقتاعى باعانىڭ جىلدىق ءوسۋى قاراشا ايىنداعى ەڭ تومەنگى دەڭگەيگە جەتكەن سوڭ 3,4 پايىزعا دەيىن ءبىرشاما جەدەلدەدى. تارگەتتى 2 پايىزعا جەتكىزۋ ءۇشىن ەۋروپا ورتالىق بانكىنەن ۇزاق ۋاقىت بويى جوعارى پايىزدىق مولشەرلەمەلەردى ساقتاۋدى قاجەت ەتەدى. وسىعان ۇقساس جاعداي ا ق ش- تا دا بايقالدى. وندا ينفلياتسيا ءالى دە ورنىقتى.
فەدەرالدى رەزەرۆتىك جۇيە ريتوريكاسىنا سايكەس، ساياساتتى جۇمسارتۋ شاراسى بيىل باستالۋى مۇمكىن. قىتايدا جىلدىق ماندە دەفلياتسيا جالعاسۋدا. الايدا، قاڭتاردا ايلىق ينفلياتسيا كورسەتكىشىندە ءوسىم تىركەلدى. رەسەيدە جىلدىق ينفلياتسيا 2024-جىلعى قاڭتار ايىندا 7,4 پايىزدى قۇرادى. نەگىزگى فاكتور بۇرىنعىسىنشا جوعارى ينفلياتسيالىق كۇتۋلەر مەن ىشكى سۇرانىستىڭ ءوسۋى بولىپ وتىر. 2024-جىلى ينفلياتسيانى ورنىنا قايتارۋ جانە ونى رەسەي ورتالىق بانكى تارگەتىنىڭ ماڭايىندا ودان ءارى تۇراقتاندىرۋ - قاتاڭ اقشا-كرەديت شارتتارىن ۇزاق كەزەڭ بويى ۇستاۋدى تالاپ ەتەدى.
«ءبىزدىڭ بولجامىمىز بويىنشا الەمدىك ازىق-تۇلىك نارىعىندا باعالار 2024-جىلدىڭ ورتاسىنا دەيىن ءبىرشاما كوتەرىلىپ، كەيىن تۇراقتانادى جانە بىرتىندەپ تومەندەيدى. العىشارتتار، ءبىر جاعىنان، تاسىمالداناتىن تاۋارلاردىڭ قۇنىنا اسەر ەتەتىن قىزىل جانە قارا تەڭىزدەگى ىقتيمال لوگيستيكالىق ماسەلەلەردىڭ تاۋەكەلدەرىن بىلدىرەدى. ال، باسقا جاعىنان، 2024-جىلعى ماۋسىمنىڭ سوڭىندا حالىقارالىق ۇيىمداردىڭ ەگىن جيناۋ بولجامدارى مەن الەمدەگى استىق قورلارىنىڭ ءوسۋى بويىنشا كۇتۋلەرىن كورسەتەدى. بيىل حالىقارالىق ۇيىمدار مۇناي باعاسى 80 دوللارعا جاقىن دەڭگەيدە تۇراقتايدى دەپ كۇتەدى. باعانىڭ وسۋىنە ىقپال ەتەتىن نەگىزگى فاكتورلار: وپەك+تىڭ مۇناي ءوندىرىسىن قىسقارتۋ مەرزىمىن ۇزارتۋى، ا ق ش- تا مۇناي ءوندىرۋ ءىسىنىڭ تۇراقتى ءوسىمى جانە تاياۋ شىعىستاعى سوعىس بويىنشا بەلگىسىزدىك. وسىنى ەسكەرە وتىرىپ، بازالىق سەناريدە Brent مۇنايىنىڭ باعاسى 2024-2025-جىلى 80 دوللار، 2026-جىلى 77 دوللار دەڭگەيىندە بەلگىلەندى»، - دەدى ول.
