ينفلياتسيا بولجامدارىنا سەنۋگە بولا ما - ۇلتتىق بانك جاۋابى

استانا. KAZINFORM - ينفلياتسيانى بولجاۋ كەزىندە قولداناتىن مودەلگە ەنگىزىلگەن العىشارتتار ينفلياتسيا بولجامدارىنىڭ ءدال كەلەتىنىن كورسەتەدى. بۇل تۋرالى ق ر ۇلتتىق بانكى ءتوراعاسىنىڭ مىندەتىن اتقارۋشى ۆيتالي تۋتۋشكين سەناتتا ايتتى.

بۇگىن سەنات قابىرعاسىندا «2025 -2027 -جىلدارعا ارنالعان رەسپۋبليكالىق بيۋدجەت تۋرالى» ق ر زاڭى قارالىپ جاتىر.

«10 ايداعى رەسمي ستاتيستيكا ەلىمىزدە ينفلياتسيا 8,5 پايىز دەڭگەيىندە قالىپتاسقانىن كورسەتتى، بۇل 6-8 ارالىعىندا كورسەتىلگەن بولجامنان اسىپ ءتۇستى. مۇندا تكش تاريفتەرىنىڭ ءوسۋى ءرول وينادى، جانار-جاعارمايعا شەكتى باعالاردىڭ جوسپارلى تۇردە الىنۋى دا قىمباتتاۋعا جانە ينفلياتسياعا ىقپال ەتتى. ۇلتتىق قوردان قوماقتى قاراجات الۋ، بيۋدجەتتىڭ تەڭگەرىمسىزدىگى، تەڭگەنىڭ ايىرباس باعامىنىڭ قۇبىلمالىلىعى سەكىلدى پروينفلياتسيالىق فاكتورلار بار. رەسەيدەن ينفلياتسيا يمپورتى سىن-قاتەرى ءتونىپ تۇر. قازان ايىندا ونداعى جوعارى- نەگىزگى مولشەرلەمە 21 پايىزعا دەيىن كوتەرىلدى، بۇل كورشى ەلدەگى ينفلياتسيانىڭ جوعارى دەڭگەيىن كورسەتەدى. اتالعان فاكتورلاردى ەسكەرە وتىرىپ، 2025 -جىلى 5,5-7,5 پايىز، 2026 -جىلى - 5-6 پايىز جانە 2027 -جىلى - 5 پايىز ينفلياتسيا بولجامى قانشالىقتى سەنىمدى؟»، - دەپ سۇرادى سەنات دەپۋتاتى نۇرلان بەكەنوۆ.

ق ر ۇلتتىق بانكى ءتوراعاسىنىڭ مىندەتىن اتقارۋشى ۆيتالي تۋتۋشكين بۇل بولجامدارعا نەگىز بار ەكەنىن ايتۋدا. ياعني، 2025 -جىلى 5,5-7,5 پايىز، سودان كەيىن 2026 -جىلى - 5-7 پايىزعا دەيىن تومەندەۋ بايقالماق.

«نەلىكتەن ءبىز بۇعان سەنىمدىمىز؟ بىرىنشىدەن، قازىرگى ينفلياتسيا ءبىز بەلگىلەگەن بولجامدارعا سايكەس كەلدى. سودان كەيىن ينفلياتسيالىق كۇتۋ تومەندەيدى دەپ بولجاپ وتىرمىز - وتكەن جىلدىڭ قازان ايىندا 16 پايىزدى، بيىلعى قازان ايىندا 12,5 پايىزدى قۇرادى. ياعني، ينفلياتسيالىق كۇتۋدىڭ ايتارلىقتاي تومەندەۋى ەكونوميكالىق سۋبەكتىلەردىڭ ۇلتتىق بانك پەن ۇكىمەت تاراپىنان ينفلياتسيانى تومەندەتۋ سالاسىندا قابىلداناتىن شەشىمدەردىڭ دۇرىستىعىن قولدايتىنىن جانە تۇسىنەتىنىن كورسەتەدى»، - دەدى ول.

ساۋدا سەرىكتەس ەلدەردە دە سپيكەر الداعى ۋاقىتتا ينفلياتسيانىڭ باياۋلاۋىن بولجاپ وتىر.

«قازىرگى ۋاقىتتا رەسەيدەگى ينفلياتسيا ديناميكاسى تەرىس سيپاتقا يە، ول ءوسىپ كەلەدى. الايدا كەلەسى جىلى رەسەيدىڭ ورتالىق بانكى ينفلياتسيانىڭ ايتارلىقتاي باياۋلايتىنىن بولجادى جانە نەگىزگى مولشەرلەمەنىڭ تومەندەۋ پروتسەسى باستالاتىنىن ايتۋدا. بۇل رەسەي تاراپىنان قازاقستانداعى ىشكى باعالارعا ينفلياتسيالىق قىسىمنىڭ ايتارلىقتاي تومەندەيتىنىن كورسەتەدى. دەگەنمەن ءبىز ورتاشا قاتاڭ اقشا-نەسيە ساياساتىن جالعاستىرامىز، ەگەر ينفلياتسيالىق پروتسەستەردىڭ تۇراقتى تۇردە تومەندەيتىنىنە سەنىمدى بولمايىنشا، بازالىق مولشەرلەمەنى تومەندەتپەيمىز. جاڭارتىلعان بولجامدار قوسىمشا 29-قاراشادا جاريالانادى»، - دەدى ۆ. تۋتۋشكين.

بۇعان دەيىن ۇلتتىق بانك ينفلياتسيا بولجامىن جاساعان ەدى.