ەينشتەين ميىنىڭ قۇپياسى اشىلدى
استانا. قازاقپارات - البەرت ەينشتەين ميىنىڭ قۇرىلىمى ونىڭ ەرەكشە ويلاۋ قابىلەتىنە اسەر ەتۋى مۇمكىن. بۇل تۋرالى PsyPost جازدى.
عالىم 1955 -جىلى قايتىس بولعاننان كەيىن پاتولوگواناتوم توماس حارۆي ونىڭ ميىن الىپ، عىلىمي زەرتتەۋلەر ءۇشىن ساقتاپ قالعان. الايدا العاشقى ماڭىزدى ناتيجەلەر تەك بىرنەشە ونجىلدىقتان كەيىن عانا جاريالانا باستادى.
1985 -جىلى نەيروبيولوگ مەريان دايموند جۇرگىزگەن زەرتتەۋ ميىنىڭ توبە بولىگىندە (ابستراكتىلى ويلاۋ مەن اقپاراتتى وڭدەۋگە جاۋاپتى ايماق) گليالدى جاسۋشالاردىڭ كوپ ەكەنىن كورسەتتى. بۇل نەيرونداردىڭ بەلسەندىلىگى جوعارى بولعانىن ءبىلدىرۋى مۇمكىن.
كەيىن ساندرا ۆيتەلسون توبى ەينشتەيننىڭ توبە بولىكتەرى قاراپايىم ادامدارعا قاراعاندا شامامەن %15 عا كەڭ ەكەنىن انىقتادى. سونىمەن قاتار، ميداعى سيلۆي جۇلگەسىنىڭ ەرەكشە ءپىشىنى نەيروندار اراسىنداعى بايلانىستى تيىمدىرەك ەتۋى ىقتيمال.
انتروپولوگ دين فالك موتورلىق قىرتىستىڭ قۇرىلىمى مۋزىكانتتاردىكىنە ۇقساس ەكەنىن بايقاعان. بۇل دا قىزىق جايت، ويتكەنى ەينشتەين سكريپكادا ويناعان. ياعني مي تاجىريبە ارقىلى وزگەرىپ وتىراتىنى دالەلدەنەدى.
2013 -جىلى Brain جۋرنالىندا جاريالانعان زەرتتەۋ مي سىڭارلارىن بايلانىستىراتىن corpus callosum قالىڭىراق بولعانىن كورسەتتى. بۇل لوگيكالىق جانە بەينەلىك ويلاۋ اراسىنداعى اقپارات الماسۋدىڭ جوعارى دەڭگەيىن ءبىلدىرۋى مۇمكىن.
سونداي-اق نيەۆرولوگ فرەدەريك لەپور بۇرىن بەلگىسىز بولعان فوتوسۋرەتتەردى زەرتتەپ، ماڭداي بولىگىندە قوسىمشا ءيىرىم بار ەكەنىن انىقتاعان. بۇل ايماق جوسپارلاۋ جانە كۇردەلى ويلاۋ پروتسەستەرىنە جاۋاپ بەرەدى.
دەگەنمەن عالىمدار ءبىر ماڭىزدى نارسەنى ەسكەرتەدى: مي قۇرىلىمى مەن دانىشپاندىق اراسىندا تىكەلەي بايلانىس ورناتۋ مۇمكىن ەمەس. الايدا ەرەكشە اناتوميالىق ەرەكشەلىكتەردىڭ جيىنتىعى ەينشتەيننىڭ بىرەگەي ويلاۋ قابىلەتىنە نەگىز بولۋى ىقتيمال.
