ەگىندى تاپتاپ جاتىر: فەرمەرلەر كيىكتىڭ سانىن رەتتەۋدى تالاپ ەتتى

ورال. KAZINFORM - باتىس قازاقستان وبلىسىندا ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ ءوڭىردىڭ فەرمەرلىك جانە شارۋا قوجالىقتارىمەن كەزدەستى. ءىس-شارا بارىسىندا مينيستر اۋىل شارۋاشىلىعى القاپتارىنا كيىكتەن كەلتىرگەن زالال تۋرالى وتىنىشتەردى تىڭدادى، دەپ حابارلايدى ەكولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتى.

باتىس قازاقستان وبلىسىنىڭ فەرمەرلەرى دابىل قاعۋدا - ەگىستىكتەر تاپتالىپ، مال جايىلىمدارىن جوعالتۋدا، كيىكتەردىڭ ءوسىپ كەلە جاتقان پوپۋلياتسياسى اگرارلىق قىزمەتتى توقتاتۋى مۇمكىن. فەرمەرلەردىڭ ايتۋىنشا، بۇل جاي عانا تابيعي فاكتور ەمەس، بۇل جۇيەلىك داعدارىس. جەكەلەگەن اۋدانداردا ەگىن مەن جايىلىمنىڭ تاپتالۋىنان كەلتىرىلگەن زالال جۇزدەگەن ميلليون تەڭگەنى قۇرايدى. فەرمەرلەر ينۆەستيتسيالاردى، جەمشوپتى، مالدى جانە ايماقتىڭ ازىق- تۇلىك قاۋىپسىزدىگىن قامتاماسىز ەتۋ قابىلەتىن جوعالتادى.

- ءبىز ءار ماۋسىمدا ەگىننەن ايىرىلىپ، وراسان زور شىعىنعا ۇشىراۋدامىز. بۇل جاي عانا جانۋارلار ماسەلەسى ەمەس - بۇل ازىق-تۇلىك قاۋىپسىزدىگى، شاعىن فەرمەرلەردىڭ ءومىر ءسۇرۋى جانە تۇراقتىلىق قاۋپى. ەگەر شارالار قابىلدانباسا، ءبىز بۇكىل شارۋاشىلىقتى جوعالتامىز، - دەدى «جەبە» شارۋا قوجالىعىنىڭ باسشىسى قايرات زۋلكاشيەۆ.

«eCO Club» ج ش س ديرەكتورى بەكجان سابانوۆ شەشىمدى كەيىنگە قالدىرۋعا بولمايتىنا توقتالدى.

- كيىك سانى اۋىل شارۋاشىلىعىنا قاۋىپ توندىرەتىن دەڭگەيگە جەتتى. جابايى تابيعات پەن ەكونوميكالىق قىزمەت اراسىنداعى قاقتىعىستى بولدىرماۋ ءۇشىن پوپۋلياتسيالار سانى بۇكىل الەمدە رەتتەلەدى. مىسالى، اۆستراليادا كەنگۋرۋ سانى باقىلانادى. ال، بىزگە تالقىلاۋ قاجەت ەمەس - بىزگە ناقتى شارالار قاجەت، - دەيدى ول.

ءوزىنىڭ عىلىمي ۇستانىمىن بيولوگيا عىلىمدارىنىڭ دوكتورى، جاڭگىر حان اتىنداعى ب ق ا ت ۋ پرورەكتورى ءالجان ءشامشىدىن جاعدايدىڭ عىلىمي دالەلدەرگە نەگىزدەلگەن ارالاسۋدى قاجەت ەتەتىنىن اتاپ ءوتتى.

- ءبىز ساننىڭ ارتۋىن تىركەيمىز، مۇنداي تىعىزدىقتا جانۋارلار دا، ادامدار دا زارداپ شەگەدى. جابايى جانۋار سانىن رەتتەۋ - وركەنيەتتى ەلدەردە قولدانىلاتىن عىلىمي نەگىزدەلگەن قۇرال. بۇل ءتۇردىڭ قىسقارۋى ەمەس، ونىڭ تۇراقتىلىعى ءۇشىن ەكوجۇيەنى باسقارۋ، - دەپ اتاپ ءوتتى ءا. ءشامشىدىن.

2025-جىلعى ەسەپ دەرەكتەرى بويىنشا قازاقستاندا كيىك سانى 3,9 ميلليون باسقا جەتتى. بۇل 1974-جىلى تىركەلگەن تاريحي ماكسيمۋمنان ءۇش ەسە كوپ (1,2 ميلليون). تەك باتىس قازاقستان وبلىسىنداعى بۇل تۇياقتى سانى 2,3 ميلليون باستان اسادى.

ەكولوگيا جانە تابيعي رەسۋرستار ءمينيسترى ەرلان نىسانبايەۆ تالقىلاۋ قورىتىندىسى بويىنشا كيىك سانىن رەتتەۋ تۋرالى شەشىم قابىلدادى. ول ق ر عىلىم جانە جوعارى ءبىلىم مينيسترلىگىنىڭ زوولوگيا ينستيتۋتىنىڭ عالىمدارى دايىنداعان بيونەگىزدەمە، سونداي-اق اۆستراليا، فينليانديا، كانادا، ا ق ش، وڭتۇستىك افريكا جانە ت. ب. ەلدەردىڭ جابايى جانۋارلار پوپۋلياتسياسىن تۇراقتى باسقارۋ سالاسىنداعى حالىقارالىق تاجىريبەنى تالداۋدان تۋىنداعان شەشىم.

- عىلىمي تۇجىرىمدارعا، فەرمەرلەردىڭ ۇسىنىستارىنا جانە الەمدە قولدانىلاتىن جەكەلەگەن تۇرلەردى رەتتەۋ تاجىريبەسىنە سۇيەنە وتىرىپ، كيىك سانىن رەتتەۋ تۋرالى شەشىم قابىلداندى، - دەيدى مينيستر.

ەكولوگيا جانە تابيعي رەسۋرستار مينيسترلىگى «وحوتزووپروم» ءو ب ر م ق ك كۇشىمەن جانە قۇرالدارىمەن جانۋارلاردى ىرىكتەپ رەتتەۋدى جۇرگىزەدى. جانۋارلاردى ىرىكتەۋ حالىقارالىق تابيعات قورعاۋ كەلىسىمدەرىنە سايكەس عىلىمي نەگىزدەمەگە سۇيەنىپ جاسالادى.

زارداپ شەككەن وڭىرلەردىڭ اكىمدىكتەرى اۋىل شارۋاشىلىعى جانە ەكولوگيا مينيسترلىكتەرىمەن بىرلەسىپ ەپيزووتيالىق مونيتورينگتى، قابىلداۋ جانە قايتا وڭدەۋ پۋنكتتەرىنىڭ دايىندىعىن، ەكولوگيالىق زاڭناماعا سايكەس بارلىق ۆەتەريناريالىق- سانيتاريالىق جانە وزگە دە تالاپتاردى ساقتاي وتىرىپ، قوسىمشا شارالاردى قامتاماسىز ەتەدى.

ەسكە سالا كەتەيىك، بۇعان دەيىن ەكولوگيا جانە تابيعي رەسۋرستار ءمينيسترى ەرلان نىسانبايەۆ ەلدەگى كيىك سانىن رەتتەۋگە قانشا كيىك جىبەرىلەتىنىن ايتقان بولاتىن.