يندونەزيادا ەسىرتكىمەن ۇستالعان قازاقستاندىقتار ەلگە قايتارىلۋى مۇمكىن بە

استانا. KAZINFORM - سىرتقى ىستەر ءمينيسترىنىڭ ورىنباسارى الىبەك باقايەۆ سەنات وتىرىسىنان كەيىن جۋرناليستەرگە يندونەزيانىڭ بالي ارالىندا 49 گرامم مەتامفەتامينمەن ۇستالدى دەلىنگەن قازاقستان ازاماتتارى تۋرالى مالىمەت بەردى.

- بۇل اقپارات رەسمي تۇردە راستالدى. يندونەزيا تارابى بىزگە بۇل اقپاراتتى ەلشىلىككە جولدادى. قازاقستاننىڭ 2 ازاماتى يندونەزيانىڭ زاڭىن بۇزىپ، ۇستالدى. يندونەزيا تارابى قازىر ءتيىستى تەرگەۋ جۇمىستارىن جۇرگىزىپ جاتىر. قازاقستان مەن يندونەزيا اراسىندا ۇستالعان ازاماتتاردى الماۋ تۋرالى قۇجاتتار ازىرشە جوق. ءبىراق 2014 -جىلدان بەرى بۇل ماسەلەنى يندونەزيا تارابىمەن كوتەرىپ جاتىرمىز. بۇگىنگە دەيىن ونداي وقيعا بولماعاندىقتان، يندونەزيا تارابىنىڭ ونداي قۇجاتتاردىڭ قاجەتى جوق دەگەن ۇستانىمى بولعان. بۇگىنگى تاڭدا قاجەتتىلىگى بار. دەگەنمەن، ونداي قۇجاتتار بولماسا دا، زاڭدى تۇردە يندونەزيا تارابىنا رەسمي ساۋال جاساۋعا مۇددەلىمىز. سول ساۋالعا يندونەزيا تارابى جاۋاپ بەرسە، سونىڭ نەگىزىندە ەكىجاقتى قارىم-قاتىناس جالعاسادى، - دەدى ول جۋرناليست سۇراعىنا بەرگەن جاۋابىندا.

الىبەك باقايەۆ ديپلوماتتار يندونەزيا سوتى قازاقستاندىقتاردىڭ ارەكەتى بويىنشا قانداي شەشىم شىعاراتىنىن كۇتەتىنىن ايتتى.

- بۇگىنگى تاڭدا ول ەكى وتانداسىمىز تۋرالى رەسمي اقپارات بار. يندونەزيا تارابى قانداي شەشىم قابىلدايتىنىن كۇتەمىز. سوت شەشىمى شىققاننان كەيىن، سونىڭ ناتيجەسى بويىنشا جۇمىس جۇرگىزەمىز، - دەدى مينيستر ورىنباسارى.

ديپلوماتتىڭ ايتۋىنشا، اتالعان قازاقستان ازاماتتارى يندونەزياداعى قازاقستان كونسۋلدىعىنا جۇگىنبەگەن. ءبىراق ديپلوماتيالىق كانالمەن اقپارات كەلىپ تۇسكەن بويدا كونسۋلدىق زاڭ اياسىندا تەرگەۋ تارابىمەن بايلانىسقا شىققان.

- بۇل ماسەلە ازاماتتاردىڭ وزدەرىنە بايلانىستى. ولار سىرتتا ۇستالسا، وزدەرى كونسۋلدى شاقىرۋعا حاقىلى بولعان. كونسۋل كەرەك دەگەن حابار بەرسە، مىندەتتى تۇردە يندونەزياداعى كونسۋلىمىز بارىپ، سول ازاماتتارمەن سويلەسەدى. بۇگىنگى تاڭدا بايلانىس بولمادى. كونسۋلدىق وكىلدەرى ونى كۇتپەستەن تەرگەۋ تارابىمەن بايلانىسقا شىقتى. ءبىراق قورعاۋشىنى يندونەزيا تارابى بەردى. بۇل جەردە قازاقستان ازاماتتارى عانا ەمەس، كۇدىككە ىلىنگەن باسقا ەلدەردىڭ ازاماتتارى دا بار، - دەدى ديپلومات.

بۇعان دەيىن اتالعان قازاقستاندىقتار يندونەزيا زاڭناماسى بويىنشا ءولىم جازاسىنا كەسىلۋى مۇمكىن ەكەنىن جازعان ەدىك.