يندونەزيادا ۇستالعان قازاقستاندىقتارعا ادۆوكاتتار ىزدەستىرىلىپ جاتىر –س ءى م
استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ يندونەزيادا ەسىرتكى تاراتۋ كۇدىگىمەن ۇستالعان قازاقستاندىقتار تۋرالى مالىمەتتەردى ايتتى.
- وسىعان دەيىن يندونەزيادا قازاقستاننىڭ ەكى ازاماتى ۇستالدى دەگەن اقپارات تارادى. ولار ەسىرتكى ساتتى دەگەن كۇدىكپەن قۇرىقتالدى، قازىر تەرگەۋ امالدارى ءجۇرىپ جاتىر. ءبىز ولاردىڭ تۋىستارىمەن بايلانىستامىز. ارينە، ادۆوكات جانە باسقا دا ماسەلەلەرگە قاتىستى كومەكتەسىپ جاتىرمىز. ءبىراق قازاقستان مەن يندونەزيا اراسىندا سوتتالعانداردى بەرۋ تۋرالى ەكىجاقتى كەلىسىم جوق. دەگەنمەن، ديپلوماتتار ولارعا كومەكتەسۋ ءۇشىن بارلىق كۇش-جىگەرىن سالىپ جاتىر، - دەدى ايبەك سمادياروۆ ەلوردادا وتكەن باسپا ءسوز ءماسليحاتىندا.
ونىڭ ايتۋىنشا، اتالعان ەلدەگى جەرگىلىكتى بيلىكپەن كەلىسسوز ءجۇرىپ جاتىر.
- الداعى سوتتى كۇتەمىز. سوت شەشىمى شىققاننان كەيىن، ءتيىستى ءىس-قيمىلدار جاسالادى، - دەدى رەسمي وكىل.
بۇعان دەيىن يندونەزيانىڭ بالي ارالىندا ەسىرتكىگە بايلانىستى قىلمىس جاسادى دەگەن كۇدىكپەن ۇستالعان ەكى قازاقستان ازاماتىنا ءولىم جازاسى تاعايىندالۋى مۇمكىن ەكەنى ايتىلدى.
جاقىندا سىرتقى ىستەر ءمينيسترىنىڭ ورىنباسارى الىبەك باقايەۆ سەنات وتىرىسىنان كەيىن جۋرناليستەرگە يندونەزيانىڭ بالي ارالىندا 49 گرام مەتامفەتامينمەن ۇستالدى دەلىنگەن قازاقستان ازاماتتارى تۋرالى مالىمەت بەردى.
