يندونەزيادا ليەۆوتوبي لاكي-لاكي جانارتاۋى تاعى دا اتقىلادى
استانا. KAZINFORM - يندونەزيانىڭ شىعىس نۋسا- تەنگگارا پروۆينتسياسىندا ورنالاسقان ليەۆوتوبي لاكي- لاكي جانارتاۋى تاعى دا اتقىلادى.
يندونەزيانىڭ ۆۋلكانولوگيا جانە گەولوگيالىق ءقاۋىپ- قاتەرلەردى ازايتۋ ورتالىعىنىڭ مالىمەتىنشە، جانارتاۋ اتقىلاۋى 18-ماۋسىمنان بەرى جالعاسىپ كەلەدى، دەپ جازادى Anadolu.
كەزەكتى اتقىلاۋ بۇگىن جەرگىلىكتى ۋاقىتپەن 01:05 تە بولعان. اتقىلاۋ ناتيجەسىندە كۇل باعانى 18 شاقىرىم بيىكتىككە دەيىن كوتەرىلگەن. قىزعان گازدان پايدا بولعان بۇلتتار جانارتاۋ باۋرايىمەن تومەن قاراي جىلجىسا، كۇل جاقىن ماڭداعى اۋىلدارعا تارالعان.
قازا تاپقاندار مەن زارداپ شەككەندەر تۋرالى اقپارات جوق.
18-ماۋسىمدا بولعان العاشقى اتقىلاۋدان كەيىن قاۋىپ دەڭگەيى ەڭ جوعارعى دەڭگەيگە كوتەرىلىپ، جانارتاۋدىڭ اينالاسىنداعى تىيىم سالىنعان ايماق 7 شاقىرىمعا دەيىن كەڭەيتىلگەن.
بيىكتىگى 1584 مەتر بولاتىن ليەۆوتوبي لاكي-لاكي تاۋى كورشىلەس ورنالاسقان ليەۆوتوبي پەرەمپۋان جانارتاۋىمەن «ەگىز» دەپ سانالادى.
يندونەزيا تىنىق مۇحيتىنداعى «وت ساقيناسى» ايماعىنا كىرەدى جانە ەل اۋماعىندا شامامەن 130 بەلسەندى جانارتاۋ بار.
2024 -جىلدىڭ قاراشا ايىندا ليەۆوتوبي لاكي-لاكي جانارتاۋىنىڭ اتقىلاۋىنان 9 ادام قازا تاۋىپ، ونداعان تۇرعىن جاراقات العان.
