يندونەزيا رەسمي تۇردە بريكس قاتارىنا قوسىلدى
استانا. KAZINFORM - يندونەزيا سىرتقى ىستەر مينيسترلىگى 7-قاڭتار كۇنى مالىمدەمە جاساپ، وڭتۇستىك- شىعىس ازياداعى وسى ەلدىڭ بريكس- كە رەسمي مۇشە بولعانىن حابارلادى.
بۇل تۋرالى قىتايلىق CNS جازدى.
- قارقىندى دامىپ كەلە جاتقان جانە ءارتاراپتاندىرىلعان ەكونوميكا رەتىندە يندونەزيا ەكونوميكالىق تۇراقتىلىقتى، تەحنولوگيالىق ىنتىماقتاستىقتى جانە ورنىقتى دامۋدى ىلگەرىلەتۋ، سونداي-اق كليماتتىڭ وزگەرۋى، ازىق-تۇلىك قاۋىپسىزدىگى مەن قوعامدىق دەنساۋلىق سياقتى جاھاندىق سىن-قاتەرلەرگە قارسى ءىس-قيمىلدى قوسا العاندا، بريكس ەلدەرىنىڭ كۇن تارتىبىنە بەلسەندى ۇلەس قوسۋعا بەيىلدى ەكەنىن ءبىلدىردى. يندونەزيا باسقا دامۋشى ەكونوميكالارمەن ىنتىماقتاستىقتى نىعايتۋ ارقىلى تەڭدىك، ءوزارا قۇرمەت جانە تۇراقتى دامۋ سياقتى ورتاق قاعيداتتاردى العا جىلجىتىپ، ادىلەتتى، بەيبىت جانە وركەندەگەن الەم قۇرۋعا ۇمتىلادى، - دەپ اتاپ كورسەتىلگەن مالىمدەمەدە.
CNS- ءتىڭ جازۋىنشا، 2025 -جىلى بريكس-كە ءتوراعالىق ەتەتىن برازيليا 6-قاڭتار كۇنى يندونەزيانىڭ ۇيىمعا رەسمي قوسىلعانى تۋرالى مالىمدەمە جاساعان.
مالىمدەمەدە يندونەزيانىڭ بريكس-كە قوسىلۋ تۋرالى ءوتىنىشى وڭتۇستىك افريكانىڭ يوحاننەسبۋرگ قالاسىندا 2023 -جىلى بريكس كوشباسشىلارىنىڭ 15- سامميتىندە ماقۇلدانعانى ايتىلدى.
قازاقستان 2025 -جىلدىڭ 1-قاڭتارىنان باستاپ بريكس- كە سەرىكتەس ەل اتاندى. بريكس- ءتىڭ 2024 -جىلى قاراشا ايىندا قازان قالاسىندا وتكەن كەزەكتى سامميتىنىڭ شەشىمىنە سايكەس، ءبىزدىڭ ەلىمىزدەن باسقا، بۇل ساناتتا بەلارۋس، بوليۆيا، يندونەزيا، تايلاند، كۋبا، ۋگاندا، مالايزيا جانە وزبەكستان دا بار ەدى.
ايتا كەتەيىك، ترامپ بريكس ەلدەرى دوللاردان باس تارتقان جاعدايدا باج سالىعى سالىناتىنىن ەسكەرتتى.
ەرلان مازان
اۆتور
