يميدجدىك شارالاردان باس تارتۋ: ۇنەمدەلگەن قارجى قايدا جۇمسالادى

استانا. KAZINFORM - پرەزيدەنت تاپسىرماسى بويىنشا ءبىرقاتار ءىس-شارا وتپەيتىن بولدى.

ەسكە سالا كەتسەك، بيىل مەملەكەت باسشىسى ەلىمىزدىڭ ءبىرقاتار وڭىرىندەگى سۋ تاسقىنىنا بايلانىستى قالىپتاسقان كۇردەلى جاعدايدى ەسكەرە وتىرىپ، سونداي-اق بيۋدجەت قارجىسىن ۇنەمدەۋ ماقساتىندا ۇكىمەتكە، ورتالىق مەملەكەتتىك جانە جەرگىلىكتى اتقارۋشى ورگاندارعا يميدجدىك جانە باسقا دا ءىرى ءىس-شارالاردى وتكىزبەۋ جونىندە تاپسىرما بەردى.

وسى ورايدا Kazinform اگەنتتىگى قارجى مينيسترلىگىنەن ناقتى قانداي يميدجدىك ءىس-شارالاردىڭ وتپەيتىندىگى جانە قانشا قارجى ۇنەمدەلگەنى تۋرالى سۇراعان ەدى.

«ەلىمىزدىڭ بيۋدجەت زاڭناماسىنا سايكەس رەسپۋبليكالىق جانە جەرگىلىكتى بيۋدجەت دەربەس جۇمىس ىستەيدى. ءبىرقاتار وڭىردەگى قالىپتاسقان جاعدايعا بايلانىستى مەملەكەت باسشىسى ورتالىق مەملەكەتتىك جانە جەرگىلىكتى اتقارۋشى ورگاندارعا يميدجدىك جانە باسقا دا ءىرى ءىس-شارالارعا ارنالعان شىعىستاردى قايتا قاراۋدى تاپسىردى»، - دەلىنگەن اگەنتتىك جولداعان رەسمي ساۋالدىڭ جاۋابىندا.

سونىمەن پرەزيدەنت تاپسىرماسىنان كەيىن، وتپەيتىن بولعان ءىس- شارالار:

- استانا حالىقارالىق ەكونوميكالىق فورۋمى؛

- ەكولوگيا ماسەلەلەرى بويىنشا ازياداعى ءوزارا ءىس-قيمىل جانە سەنىم شارالارى جونىندەگى كەڭەس (ا و س ش ك)؛

- «ورتالىق ازيا پليۋس جاپونيا» سامميتى شەڭبەرىندە ورتالىق ازيا ەلدەرى مەن جاپونيانىڭ ەكولوگيا مينيسترلەرىنىڭ كەزدەسۋى.

«وسىعان بايلانىستى، ورتالىق مەملەكەتتىك ورگاندار ناقتى كورسەتىلگەن قىزمەتتەرگە سايكەس جۇمسالعان شىعىستاردى ەسكەرە وتىرىپ، ءتيىستى ءىس-شارالاردىڭ كۇشىن جويۋ جانە بيۋدجەت قاراجاتىن قايتارۋ بويىنشا جۇمىس جۇرگىزۋدە»، - دەيدى ۆەدومستۆودان.

قارجى مينيسترلىگى ۇنەمدەلگەن قاراجاتتى بارىنشا ەكونوميكالىق قايتارىمى بار ءىس-شارالارعا قايتا باعدارلاۋدى جوسپارلاپ وتىر.

«مەملەكەتتىك ورگاندارمەن بىرلەسىپ ەكونوميكالىق جانە الەۋمەتتىك تيىمدىلىككە باسا نازار اۋدارا وتىرىپ، بيۋدجەتتى جوسپارلاۋدىڭ تيىمدىلىگىن ارتتىرۋ بويىنشا جۇمىس ءجۇرىپ جاتىر»، - دەيدى مينيسترلىكتەن.

اۆتور

داۋلەت ىزتىلەۋ