يمپورتتى الماستىرۋ: بيىل 1,5 تريلليون تەڭگەنىڭ 180 جوباسى جۇزەگە اسادى
استانا. KAZINFORM – ق ر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن وتاندىق كاسىپكەرلەر كەڭەسىنىڭ وتىرىسىندا يمپورتتى الماستىرۋدى دامىتۋ جانە قازاقستاندىق تاۋارلار مەن قىزمەتتەردىڭ ەكسپورتتىق الەۋەتىن ارتتىرۋ ماسەلەسى قارالدى.
قابىلدانعان شارالاردىڭ ارقاسىندا سوڭعى جىلدارى وڭدەۋ ونەركاسىبى ەكسپورتىنىڭ كولەمى وسكەن.
بۇل رەتتە قازاقستاننىڭ يمپورتتالاتىن تاۋارلاردىڭ ەداۋىر بولىگىن جەرگىلىكتى جەردە ءوندىرۋ ءۇشىن الەۋەتى جەتكىلىكتى.
«بۇل جۇمىسقا ەل ىشىندەگى كادرلاردى، شيكىزات پەن تاۋارلاردى بارىنشا جۇمىلدىرۋ ماڭىزدى. ۇكىمەت باسەكەگە قابىلەتتى كاسىپورىنداردى دامىتۋ ءۇشىن قولايلى جاعداي جاساۋ جۇمىسىن جالعاستىرادى»، - دەدى ءاليحان سمايىلوۆ.
ونەركاسىپ جانە قۇرىلىس ءمينيسترى قانات شارلاپايەۆتىڭ بايانداۋىنشا، وتكەن جىلدىڭ 11 ايىنىڭ قورىتىندىسىنا سايكەس وڭدەۋ ونەركاسىبىنىڭ سىرتقى ساۋدا اينالىمى %12 عا ارتىپ، $74,2 ميللياردتى قۇراعان.
2023 -جىلى ءىرى تاپسىرىس بەرۋشىلەر مەن وتاندىق وندىرۋشىلەر اراسىندا جالپى قۇنى 66 ميلليارد تەڭگەنى قۇرايتىن ۇزاق مەرزىمدى 179 شارت پەن وففتەيك-كەلىسىمشارت جاسالدى.
يمپورت الماستىرۋدى ىنتالاندىرۋ ءۇشىن وتاندىق وڭدەۋشىلەردى قولجەتىمدى باعادا شيكىزاتپەن قامتاماسىز ەتۋ مەحانيزمى ىسكە قوسىلدى.
سونىمەن قاتار وڭدەۋ ونەركاسىبىندە يمپورتتى الماستىرۋعا جانە ەكسپورتقا باعىتتالعان ينۆەستيتسيالىق جوبالاردى ىسكە اسىرۋ بويىنشا جۇمىستار جۇرگىزىلۋدە.
بيىل جالپى قۇنى 1,5 تريلليون تەڭگە بولاتىن 180 جوبانى جۇزەگە اسىرۋ جوسپارلانىپ وتىر.
ناتيجەسىندە 18 مىڭنان استام جۇمىس ورنى اشىلادى.
قورىتىندىلاي كەلە، پرەمەر-مينيستر يمپورت الماستىرۋدى دامىتۋ ەكونوميكا تۇراقتىلىعىن قامتاماسىز ەتەتىن ماڭىزدى فاكتور ەكەنىن اتاپ ءوتتى.
