يمپورت ءوستى: ەت پەن ءسۇت ونىمدەرىنەن جىلدا 800 ميلليون دوللار جوعالتامىز

сүт цех
Фото: Целиноград ауданы әкімдігі

استانا. KAZINFORM - اۋىل شارۋاشىلىعىندا دايىن ءونىمنىڭ يمپورتى ءوسىپ كەلەدى. بۇل تۋرالى پارلامەنت ماجىلىسىندە مال شارۋاشىلىعى ونىمدەرىن تەرەڭ وڭدەۋ تاقىرىبىنا ارنالعان ۇكىمەت ساعاتىندا دەپۋتات سەرىك ەگىزبايەۆ ايتتى.

«مال شارۋاشىلىعى ونىمدەرىن ءوندىرۋ سەرپىنى تۇراقتى دامۋدى كورسەتىپ جاتىر جانە ءوسۋ ۇردىسىنە يە. سونىمەن قاتار، تەرەڭ وڭدەۋدىڭ ۇلەسى ءالى دە تومەن. قايتا وڭدەۋ جانە تاماق ونەركاسىبىنىڭ ۇلەسى ەلىمىزدىڭ بارلىق ونەركاسىبى ونىمدەرىن ءوندىرۋدىڭ جالپى كولەمىنىڭ نەبارى 6 پايىزىن قۇرادى.

اتاپ ايتقاندا، 2023 -جىلى ءسۇت وڭدەۋ ۇلەسى 33 پايىزدى، ەت وڭدەۋ - 41%، ءجۇن وڭدەۋ - 19%، ءىرى قارا مال تەرىسىن وڭدەۋ ۇلەسى 6 پايىزدى عانا قۇرادى» ، - دەدى س. ەگىزبايەۆ.

ونىڭ ايتۋىنشا، دايىن ءونىمنىڭ يمپورتى ءوسىپ كەلەدى. 2023 -جىلى ءسۇت ونىمدەرى بويىنشا ءوسىم 400 ميلليون ا ق ش دوللارىن قۇرايتىن 20 پايىزدان استى، ال ەت پەن ەت ونىمدەرىنىڭ يمپورتى 408 ميلليون ا ق ش دوللارىن قۇرادى.

«وسىلايشا، تەك ەت پەن ءسۇت ونىمدەرى بويىنشا قايتا وڭدەۋدىڭ ناشار جۇرگىزىلۋىنىڭ سالدارىنان ءبىز جىل سايىن 800 ميلليون ا ق ش دوللارىن جوعالتىپ، ولار شەتەلدىك فەرمەرلەردى قارجىلاندىرۋعا كەتىپ جاتىر. ءبىزدىڭ ويىمىزشا، قالىپتاسقان جاعدايدىڭ نەگىزگى سەبەپتەرى بۇرمالانعان ستاتيستيكا سالدارىنان بولىپ وتىر. ساراپشىلاردىڭ پىكىرىنشە، كورسەتكىشتەردى اسىرىپ كورسەتۋ تەك قانا ءسۇت بويىنشا 2 ميلليون توننانى، ءىرى قارا مالدىڭ سانى بويىنشا 1 ميلليون باستى قۇرايدى. بۇل وسى ۋاقىتقا دەيىن مال باسىن ەسەپكە الۋدىڭ ناقتى جانە اشىق جۇيەسىنىڭ دۇرىس جولعا قويىلماۋىنىڭ سالدارىنان دەپ ەسەپتەيمىز. وسى سالانى رەتكە كەلتىرىپ، زاماناۋي سيفرلىق تەحنولوگيالاردى قولدانا وتىرىپ، مال باسى مەن وندىرىلەتىن مال شارۋاشىلىعى ونىمدەرى بويىنشا ستاتيستيكالىق كورسەتكىشتەردى قالىپتاستىرۋدىڭ ءبىرىڭعاي جۇيەسىن ەنگىزەتىن كەز كەلدى» - دەدى دەپۋتات.

اۆتور

رۋسلان عابباسوۆ

سوڭعى جاڭالىقتار