يۋليا پۋتينتسيەۆا قىتايداعى ءتۋرنيردى جەڭىسپەن باستادى

قازاقستاننىڭ ەكىنشى، الەمنىڭ 81-راكەتكاسى يۋليا پۋتينتسيەۆا گۋاڭجوۋ (قىتاي) WTA 250 ءتۋرنيرىن جەڭىسپەن باستادى، دەپ حابارلايدى قازاقپارات ءتىلشىسى.

قازاقستاندىق تەننيسشى باستاپقى كەزدەسۋىن دۇنيەجۇزىلىك رەيتينگتە 123-ورىندا تۇرعان كورت يەسى يۋ. سياوديمەن وتكىزدى.

تارتىستى وربىگەن ءبىرىنشى پارتيادا يۋ. پۋتينتسيەۆا 6:4 ەسەبىمەن باسىم ءتۇستى.

ەكىنشىسىندە ءتىپتى بەت قاراتقان جوق - 6:0.

ءبىر ساعات 41 مينۋتقا سوزىلعان كەزدەسۋدە يۋليا 11 برەيك- پوينتتىڭ بەسەۋىن پايدالانا ءبىلدى. قارسىلاسى 1 ەيس، 1 برەيكپەن (4 برەيك- پوينت) شەكتەلدى.

يۋليا پۋتينتسيەۆا شيرەك فينالعا شىعۋ ءۇشىن الەمنىڭ 76-راكەتكاسى، دانيالىق كلارا تاۋسونمەن سىنعا تۇسەدى.

ەسكە سالا كەتەيىك، بۇدان بۇرىن يۋليا پۋتينتسيەۆانىڭ قىتايداعى تۋرنيردە ونەر كورسەتەتىنىن جازعان بولاتىنبىز.

سونداي- اق اننا دانيلينا مەكسيكاداعى تۋرنيردە ۇتىلىپ قالدى.