يلون ماسك ترامپتىڭ زاڭ جوباسىن سىنعا الدى
استانا. KAZINFORM - يلون ماسك X الەۋمەتتىك جەلىسىندە رەسپۋبليكاشىلداردىڭ زاڭ جوباسىن قاتال سىنعا الىپ، ونىڭ «ناعىز ماسقارا» ەكەنىن جازدى، دەپ حابارلايدى NBC News.
- كەشىڭىرىز، ءبىراق مەن ەندى بۇعان شىداي المايمىن. بۇل كونگرەسس شىعىندارى تۋرالى ادامنىڭ اشۋىن تۋدىراتىن جيىركەنىشتى زاڭ جوباسى. وسى جوباعا داۋىس بەرگەندەر وزدەرىنىڭ دۇرىس ىستەمەگەنىن بىلەدى، - دەپ جازدى يلون ماسك X- تە.
ماسك «شوشقا ءتارىزدى زاڭ جوباسىنا» سىلتەمە جاساعاندا «pork-filled» «شوشقا ەتىمەن تولتىرىلعان» تەرمينىن قولدانعان. سايلاۋشىلاردىڭ، بيزنەسمەندەردىڭ نەمەسە ساياساتكەرلەردىڭ كەيبىر كىشى توپتارىنىڭ مۇددەسى ءۇشىن ساياساتكەرلەر لوببي جاسايتىن بيۋدجەت شىعىندارىن وسىلاي اتايدى.
ماسك مالىمدەمەسىن كونگرەستىڭ قولعا الىنعان شارالارى تاپشىلىقتى 2,3 تريلليون دوللارعا دەيىن ۇلعايتاتىنىن ايتقاننان كەيىن جاسادى. سەبەبى سالىقتىق جەڭىلدىكتەر، ميگراتسيالىق قامتاماسىز ەتۋ شارالارىنا بولىنەتىن قارجىنىڭ شىعىنى ۇنەمدەۋدەن اسىپ تۇسپەك.
NBC News باسىلىمىنىڭ حابارلاۋىنشا، ماسكتىڭ نارازىلىعىن الەۋمەتتىك مەديا ارقىلى ءبىلدىرۋىنىڭ ارتىندا ءتورت ماسەلە بولۋى مۇمكىن.
بىرىنشىدەن، زاڭ جوباسىندا ەلەكتروموبيلدەرگە جەڭىلدىك جوق. ال بۇل ءوز كەزەگىندە Tesla ءۇشىن قاجەت نارسە. سونداي-اق ماسك ازاماتتىق اۆياتسيانىڭ فەدەرالدىق باسقارماسى ونىڭ Starlink جۇيەسىن پايدالانعانىن قالاعان ەدى. بۇعان قوسا زاڭ جوباسىندا ماسك-ءتىڭ وداقتاسى دجارەد ايزەكمان NASA اكىمشىلى لاۋازىمىنا ۇسىنىلۋ تۋرالى ايتىلماعان. سونىمەن قاتار ماسك ارنايى مەملەكەتتىك قىزمەتشى لاۋازىمىندا 130 كۇندىك مەرزىمنەن كوپ وتىرماق بولعان. الايدا اق ءۇي بۇعان كەلىسپەدى.
- ءبىز يلوننىڭ DOGE ءۇشىن ىستەگەن ىستەرىنە قۇرمەتپەن قارايمىز. بۇل ماسەلە بويىنشا ءبىزدىڭ پىكىرلەرىمىز ءارتۇرلى. ونىڭ ءوز ويىن بىلدىرۋگە قۇقى بار، ارينە، الايدا ءبىز الدىعا بار جىلدامدىقپەن جىلجىعالى تۇرمىز، - سەناتتاعى كوپشىلىك كوشباسشىسى دجون تيۋن تىلشىلەرگە.
اق ءۇيدىڭ باسپا ءسوز حاتشىسى كەرولاين ليۆيتت: «تىڭداڭىزدارشى، پرەزيدەنت بۇل زاڭ جوباسىندا يلون ماسكتىڭ قاي پوزيتسيادا تۇرعانىن قازىردىڭ وزىندە بىلەدى. بۇل پرەزيدەنتتىڭ پىكىرىن وزگەرتپەيدى. بۇل ۇلكەن، ادەمى زاڭ جوباسى جانە ول ونى ۇستانىپ وتىر، - دەپ حابارلادى.
بۇعان دەيىن ميللياردەر، ا ق ش ۇكىمەتىنىڭ تيىمدىلىگى دەپارتامەنتىنىڭ (DOGE) باسشىسى يلون ماسك ا ق ش اكىمشىلىگىندەگى قىزمەت مەرزىمى اياقتالىپ جاتقانىن حابارلادى.
اۆتور
زارينا تۋعانبايەۆا
