يلون ماسك ترامپتى ەپشتەينگە قاتىستى قۇجاتتاردى جاريالاۋعا شاقىردى

نيۋ-يورك. KAZINFORM - امەريكالىق كاسىپكەر يلون ماسك اقش پرەزيدەنتى دونالد ترامپتى ميللياردەر دجەففري ەپشتەينگە قاتىستى قۇجاتتاردى جاريالاۋعا شاقىردى.

ەپشتەين سەكسۋالدىق زورلىق-زومبىلىق پەن جەزوكشەلىك جەلىسىن ۇيىمداستىرۋ بويىنشا ايىپتالعان ەدى جانە تۇرمەدە كوز جۇمعان، دەپ جازدى انادولى.

ترامپ ءوز جازباسىندا: «ەپشتەين تۋرالى تىم ءجيى ايتىپ ءجۇرمىز، بۇلاي بولماۋى كەرەك»، - دەگەن بولاتىن.

ماسك ونىڭ سوزىنە تاڭدانىپ: «ءسىز شىنىمەن بايىپتى ايتىپ وتىرسىز با؟» - دەپ جازدى.

بۇعان دەيىن ترامپ ەپشتەيننىڭ ەسىمىن بىرنەشە رەت اتاعان، ءبىراق كەيىنىرەك بۇل تاقىرىپتى قايتا- قايتا كوتەرۋدىڭ قاجەتى جوق ەكەنىن مالىمدەگەن.

يلون ماسك ءوزىنىڭ جاۋابىندا:

«جاي عانا ۋادەڭىزگە ساي قۇجاتتاردى جاريالاڭىز»، - دەپ ترامپتى اشىقتىققا شاقىردى.

ترامپتىڭ ايتۋىنشا، ەپشتەينگە قاتىستى دوسەلەر دەموكراتتار باسقارعان الدىڭعى اكىمشىلىكتەر كەزىندە جاسالعان. ول بۇل تاقىرىپتىڭ ءالى كۇنگە دەيىن تالقىلانىپ جاتقانىنا نارازىلىق ءبىلدىرىپ، قۇجاتتار باراك وباما مەن دجو بايدەن اكىمشىلىكتەرى كەزىندە دايىندالعانىن ايتتى.

- نەلىكتەن ءبىز بۇل قۇجاتتارعا سونشا ءمان بەرەمىز، ولاردى رەسەيمەن بايلانىستى جالعان اقپارات تاراتقان ادامدار جازعان؟ - دەپ جازدى ترامپ Truth Social جەلىسىندە.