يلحام اليەۆ ورتالىق ازيا مەملەكەتتەرى باسشىلارىنىڭ VI كونسۋلتاتيۆتىك كەزدەسۋىنە قاتىسۋ ءۇشىن استاناعا كەلدى

استانا. KAZINFORM - ازەربايجان پرەزيدەنتى يلحام اليەۆ ورتالىق ازيا مەملەكەتتەرى باسشىلارىنىڭ VI كونسۋلتاتيۆتىك كەزدەسۋىنە قاتىسۋ ءۇشىن استاناعا كەلدى.

قازاقستان پرەمەر-ءمينيسترى ولجاس بەكتەنوۆ يلحام اليەۆتى ەلوردا اۋەجايىندا كۇتىپ الدى، دەپ حابارلايدى ۇكىمەتتىڭ باسپا ءسوز قىزمەتى.

ءباسپاسوز مالىمەتتەرىنە قاراعاندا، قازاقستان مەن ازەربايجان اراسىنداعى ەكىجاقتى قاتىناستار ساۋدا-ەكونوميكالىق جانە مادەني-گۋمانيتارلىق ءوزارا ءىس-قيمىلدىڭ بارلىق سپەكترى بويىنشا دامىپ كەلەدى. وتكەن جىلدىڭ قورىتىندىسى بويىنشا قازاقستان مەن ازەربايجان اراسىنداعى تاۋار اينالىمى %14,3 عا ارتىپ، $529,4 ميلليوندى قۇرادى، بيىلعى قاڭتار-ماۋسىم ايلارىندا $280,6 ميلليونعا جەتتى.

ۇكىمەتتەر مۇناي- گاز، كولىك- لوگيستيكا، سيفرلىق كوممۋنيكاتسيا جانە عارىش ونەركاسىبى سالالارىندا بىرلەسكەن جوبالاردى ىسكە اسىرىپ كەلەدى. ونىڭ ىشىندە ترانسكاسپي حالىقارالىق كولىك باعىتى شەڭبەرىندە كاسپي تەڭىزىنىڭ تۇبىمەن وپتيكالىق-تالشىقتى بايلانىس جەلىسىن جانە تەرەڭ سۋ ەلەكتر كابەلىن تارتۋ جوبالارى بار. سونداي-اق ەكىجاقتى ىنتىماقتاستىق الەۋەتىن اشۋ ماقساتىندا بىرلەسكەن تىكەلەي ينۆەستيتسيا قورى قۇرىلدى.

انىقتاما:

ايماقتىق ىنتىماقتاستىقتى تەرەڭدەتۋ مەن كەڭەيتۋگە باعىتتالعان ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋلەرى 2018 -جىلدان بەرى وتكىزىلىپ كەلەدى. سوڭعى بەس جىلدا (2018-2023 -جىلدار) ءوزارا ساۋدا كولەمى $5,7 ميللياردتان $11 ميللياردقا دەيىن ءوستى. قازاقستاننىڭ و ا ەلدەرىمەن ساۋدا- ساتتىق كولەمى وتكەن جىلى %26,8 عا ءوسىپ، $8 ميللياردقا جەتتى.