ۆيكتور وربان: اتاجۇرتقا ورالۋ قاشاندا كەرەمەت

 قازاقستان مەن ماجارستان اراسىندا قاۋىپسىزدىك ماسەلەسىنىڭ تالقىلانۋى وتە ماڭىزدى. ماجارستان پرەمەر-ءمينيسترى ۆيكتور وربان مەملەكەت باسشىسى قاسىم-جومارت توقايەۆپەن كەڭەيتىلگەن قۇرامداعى كەزدەسۋ قورىتىندىسىندا وسىنداي پىكىر ايتتى، دەپ حابارلايدى Kazinform اگەنتتىگى. 

«اتاجۇرتقا ورالۋ ءاردايىم كەرەمەت. ماجارلار قازاقستانعا كەلگەندە ەرەكشە سەزىمدى باستان كەشەدى. ويتكەنى ەكى حالىقتى عاسىرلار قويناۋىنان باستاۋ الاتىن تاريحي تامىرى بايلانىستىرادى. سوڭعى ون جىلدا ىنتىماقتاستىعىمىزدى دامىتۋعا بار كۇش-جىگەرىمىزدى جۇمسادىق ءارى جاقسى ناتيجەگە قول جەتكىزدىك. وزىڭىزبەن ىنتىماقتاسا جۇمىس ىستەۋ - مەن ءۇشىن زور مارتەبە. ماجارستان ءاردايىم قازاقستاننىڭ سەنىمدى ستراتەگيالىق سەرىكتەسى بولعان. الداعى ۋاقىتتا دا سولاي بولا بەرەدى. ماجارستان مەن قازاقستاننىڭ بايلانىستارى بۇرىن-سوڭدى جەتپەگەن دەڭگەيگە كوتەرىلدى. سونداي-اق ىقپالداستىعىمىزدىڭ، اسىرەسە ەكونوميكالىق قاتىناسىمىزدىڭ الەۋەتى زور»، - دەدى ۆيكتور وربان.

مەيمان قازاقستانعا سوڭعى رەت پاندەمياعا دەيىن كەلگەنىن ەسكە الدى.

«ول كەزدە بايلانىسىمىز جاقسى دامىپ كەلە جاتقان. ءبىراق، وكىنىشكە قاراي Covid-19 سونىڭ ءبارىن كىدىرتىپ تاستادى. بۇگىن سول قارقىندى قالپىنا كەلتىرۋ ءۇشىن كەلىپ وتىرمىز. بۇل وڭىردەگى بايلانىسىمىز نەگىزىنەن تاريحي تامىرلاستىقپەن بايلانىستى. ءبىز سىزدەردىڭ جەتىستىكتەرىڭىزگە قۋانىپ وتىرامىز. تۋىسىمىزدا ءبارى جاقسى بولسا، بۇل بىزگە دە جاقسى. وتباسى تۇتاس باقىتتى بولعانى جاقسى. سىزدەر وسىندا - شىعىستاسىزدار، ءال ءبىز - باتىستامىز. شىعىستىڭ باتىستى ءتۇسىنۋى، باتىستىڭ شىعىستى ءتۇسىنۋى ءاردايىم وڭاي بولا بەرمەيدى. ءبىراق وسى جەردە الەمگە بىرلەسىپ كوز تاستاۋعا بولادى. ءبىز قازىر قاۋىپسىزدىك تۇرعىسىنان تۇراقسىز كەزەڭدە ءومىر ءسۇرىپ جاتىرمىز. بۇل ماسەلەلەردى دوستارىمىزبەن، باۋىرلاس حالىقتارمەن تالقىلاۋ وتە ماڭىزدى. تەك ەكونوميكا ەمەس، قاۋىپسىزدىك ماسەلەسىن دە. ماجارستان قازىر ەۋروپانىڭ كۇردەلى بولىگىندە تۇر. ىرگەمىزدە ۋكراينا مەن رەسەيدىڭ سوعىسى ءجۇرىپ جاتىر»، - دەدى ماجارستان پرەمەر- ءمينيسترى.

بۇعان دەيىن اقوردادا ماجارستان پرەمەر-ءمينيسترىن قارسى الۋ سالتاناتى وتكەنىن جازعان ەدىك.

قاسىم-جومارت توقايەۆ ۆيكتور وربانمەن كەزدەسۋ كەزىندە ەكى ەلدىڭ باۋىرلاستىق بايلانىسى تۋرالى ايتتى.

ەسكە سالساق، كەشە كەشكە ۆيكتور ورباندى استانا اۋەجايىندا ۆيتسە-پرەمەر سەرىك جۇمانعارين كۇتىپ العان بولاتىن.

قازاقستان باسشىلىعىمەن كەلىسسوز بارىسىندا قازاقستان مەن ماجارستان اراسىنداعى ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى ودان ءارى تەرەڭدەتۋ ماسەلەلەرى تالقىلانادى دەپ جوسپارلانىپ وتىر.

ايتا كەتۋ كەرەك، استانادا تۇركى مەملەكەتتەرى ۇيىمىنىڭ X سامميتى وتەدى.

وعان ازەربايجان، قىرعىزستان، تۇركيا، وزبەكستان پرەزيدەنتتەرى، باقىلاۋشى مەملەكەتتەر - ماجارستان مەن تۇرىكمەنستان باسشىلارى قاتىسادى.