چيكاگودا وقۋشى قۇستىڭ ساڭعىرىعىنان قاتەرلى ىسىكپەن كۇرەسۋگە كومەكتەسۋى مۇمكىن ءتۇزىلىستى انىقتاعان

چيكاگودا وقۋشى قۇستىڭ ساڭعىرىعىنان قاتەرلى ىسىكپەن كۇرەسۋگە كومەكتەسۋى مۇمكىن ءتۇزىلىستى انىقتاعان. 

وقۋشىنىڭ عىلىم كلۋبىنا قاز ساڭعىرىعىن الىپ كەلۋى وسىنداي ناتيجەگە جەتكىزدى. يللينويس ۋنيۆەرسيتەتىنىڭ زەرتتەۋشىلەرىنىڭ باقىلاۋىمەن وقۋشى قاز ساڭعىرىعىنان انتيبيوتيكالىق بەلسەندىلىككە يە باكتەريانى ءبولىپ الدى.

بۇل باكتەريا وندىرەتىن تابيعي قوسىلىس عىلىم ءۇشىن مۇلدەم جاڭا جانە زەرتحانادا قاتەرلى ىسىككە قارسى قاسيەتتەرىن كورسەتتى.

باستاما اياسىندا وقۋشىلاردان ءوز اۋدانىنان بيولوگيالىق بەلسەندى جاڭا قوسىلىستاردى ىزدەۋ تۋرالى تاپسىرما بەرىلگەن. كەيىن بالالارعا باكتەريالاردى قاۋىپسىز ءوسىرۋ جانە ۋنيۆەرسيتەت عالىمدارى ودان ءارى زەرتتەيتىن كولونيالاردى تاڭداۋ ادىستەرى ۇيرەتىلدى. قاز تەزەگىن الىپ كەلگەن وقۋشى گرامتەرىس باكتەريالاردىڭ جاڭا ءتۇرى - Pseudomonas idahonensis-تى ءبولىپ الۋعا قول جەتكىزدى. زەرتحانادا بۇل باكتەريا تەرى ينفەكسياسىن تۋدىرۋى مۇمكىن گراموڭ باكتەريالاردىڭ 90 پايىزدان استام ءوسۋىن تەجەي الاتىنى انىقتالدى.

«العاشقى بايقالعان انتيبيوتيكالىق بەلسەندىلىككە جاۋاپتى قوسىلىستى انىقتاۋ جۇمىستارى ءجۇرىپ جاتىر»، - دەپ جازادى زەرتتەۋ توبى وزدەرىنىڭ عىلىمي ماقالاسىندا. تابيعي انتيبيوتيكتەردىڭ اشىلۋى 1950 -جىلدارى ەڭ جوعارى دەڭگەيدە بولعان، ءبىراق سودان بەرى مۇنداي دارىلەردى دامىتۋدا ءقاۋىپتى قۇلدىراۋ بايقالدى.

الايدا تابيعي الەم ءالى دە سىرلارعا تولى، جانە بۇل بەلگىسىزدىك باكتەريالىق ينفەكتسيالار مەن قاتەرلى ىسىك سياقتى نەگىزگى دەنساۋلىق ماسەلەلەرىن شەشۋدە كومەكتەسە الادى.

جاڭا انتيبيوتيكتەردى تابۋ جىلدار بويى زەرتتەۋدى تالاپ ەتەدى، ءارى ساتسىزدىك ىقتيمالدىعى جوعارى. چيكاگودا جينالعان 14 ەكولوگيالىق ۇلگىنىڭ ىشىنەن تەك بىرەۋى عانا انتيبيوتيكالىق بەلسەندىلىك كورسەتتى، جانە بۇل بولاشاق زەرتتەۋلەردە راستالماۋى مۇمكىن.

دەگەنمەن، يللينويس ۋنيۆەرسيتەتىنىڭ عالىمدارى جاس ۇرپاقتى انتيبيوتيكتەردى اشۋ جۇمىستارىنا قىزىقتىرۋ ۇزاق مەرزىمدى پروتسەسس ەكەنىن ايتادى. ءبىراق ولاردىڭ جاقىندا قول جەتكىزگەن تابىسى «ءبىلىم بەرۋ باعدارلامالارىن جوعارى دەڭگەيدەگى تابيعي ونىمدەردى اشۋمەن بىرىكتىرۋدىڭ مۇمكىن ەكەنىن» كورسەتەدى.