وزىنە قول جۇمساۋدىڭ الدىن الۋ ءۇشىن نە ىستەۋ كەرەك

استانا. KAZINFORM - دۇنيەجۇزى ەلدەرىنىڭ اراسىندا قازاقستان سۋيتسيد سانى بويىنشا وكىنىشكە قاراي جەتەكشى ورىندا. وزىنە قول جۇمسايتىنداردىڭ كوبى - 15-19 جاس ارالىعىنداعى جاس وسپىرىمدەر. مۇنداي ارەكەتكە بارۋعا قانداي سەبەپتەر يتەرمەلەۋى مۇمكىن؟ ونى الدىن الۋدىڭ قانداي جولدارى بار؟ وسى ەكى ماڭىزدى سۇراقتى تالقىعا سالايىق.

جاقىندارمەن قارىم- قاتىناس ءار ادام بالاسىنا، اسىرەسە، جاسوسپىرىمدەرگە تۇراقتى قارىم-قاتىناس كەرەك. ءار كۇننىڭ قالاي وتكەنىن، قانداي قىزىقتار، كەلەڭسىز جايتتار بولعانىن ءبولىسىپ وتىرۋ وتە ماڭىزدى. اتا-انا بالاسىنىڭ ماتەريالدىق جاعدايىن تولىق قامتاماسىز ەتۋگە تىرىسادى. اقشا نەگىزگى كۇنكورىس كوزى بولعاندىقتان، قازىر بارلىعى جۇمىسباستى.

جۇمىستان قول بوساي قالعان ۋاقىتتا دەمالۋ كەرەك. ال اڭگىمەلەسۋ، سىر شەرتۋ مۇلدەم بولەك دۇنيە. جاقىنىنىڭ نازارىنان تىس قالعان بالا ونى سىرتتان ىزدەيدى. ءۇي ءىشى ونىڭ ارالاسىپ جۇرەتىن دوستارىمەن تانىس بولماۋى دا مۇمكىن. ۋاقىتىنىڭ باسىم بولىگىن الەۋمەتتىك جەلىدە وتكىزەتىن بالا بوس ۋاقىتتا نەمەن اينالىسىپ جاتقانىن اتا-انا تاعى بىلمەيدى. وسىدان كەيىن بالادان نە كۇتەسىز؟ نە نارسەدەن قينالىپ، نەدەن قورقىپ جۇرگەنىن كىمگە ايتادى؟

قىسىم. پسيحولوگيالىق قىسىم بالاعا جان جاقتان كەلۋى مۇمكىن. بالانىڭ كوپ ۋاقىتى مەكتەپتە وتەدى. ۇستازدارى اۋىر ءسوز ايتىپ، ۇرساتىن كەزدەرى بولادى. ءار ادامنىڭ قابىلداۋى ءارتۇرلى. جۇرەگىنە ءار ءسوزدى جاقىن قابىلدايتىن وقۋشى وكپە-رەنىشتى وزىنە جيناي بەرەدى.

وتپەلى كەزەڭدە كوپ جاسءوسپىرىم قولداۋعا مۇقتاج بولادى. ال قولداۋ كۇتكەن كەزدە ونىڭ ورنىنا ۇرىس ەستىگەن ءسات- ەڭ قيىنى. بۇل جەردە ۇستازدارعا كىنا ارتۋعا بولمايدى. سەبەبى، ونىڭ الدىنان ءتۇرلى وقۋشىلار دا وتەدى. دەگەنمەن، ءار ايتىلعان ءسوزدىڭ كيەسى بولاتىنىن ۇمىتپاعان ءجون. ۇلكەندەردەن الىمجەتتىك كورسەتىلەتىن وقيعالار دا ءجيى ۇشىراسادى. بالانى اينالاسىنداعىلار كەمسىتەدى، مازاق قىلادى، قىسىم كورسەتەدى، سوگەدى. وسىنىڭ ءوزى جاس جۇرەكتىڭ سەزىمىن تابالاماي ما؟ قاراستىرىلعان ماسەلەلەر ءسىز ءۇشىن ۇساق- تۇيەك بولىپ كورىنۋى مۇمكىن. ءدال وسى ۇساق- تۇيەك ادامداردىڭ تاعدىرىن شەشىپ جاتقانىن اڭعارمايسىز دا. سول سەبەپتى سۋيتسيدتىڭ الدىن الۋ ءۇشىن اتالعان سەبەپتەرگە كەرى امال جاساۋ كەرەك.