وزبەكستاننان شەتەلگە تۇراقتى تۇرۋ ءۇشىن كوشكەندەردىڭ سانى ارتتى

استانا. قازاقپارات - 2025 -جىلدىڭ ءبىرىنشى 6 ايىندا 2024 -جىلدىڭ سايكەس كەزەڭىمەن سالىستىرعاندا شەتەلگە تۇراقتى تۇرۋ ءۇشىن كوشكەندەردىڭ سانى شامامەن 10 پايىز ءوستى. بۇل تۋرالى اقپارات ستاتيستيكا كوميتەتىنىڭ كەزەكتى شولۋىندا بەرىلگەن.

سوڭعى جارتى جىلدا وزبەكستاننان 5551 ادام تۇراقتى تۇرۋ ءۇشىن شەتەلگە كوشىپ كەتكەن. الايدا بۇرىنعىلاردان ايىرماشىلىعى، تۇرعىنداردىڭ قاي ەلدەرگە كەتكەنى ايتىلمادى.

سالىستىرۋ ءۇشىن، 2024 -جىلدىڭ العاشقا 6 ايىندا 5066 وزبەكستاندىق شەتەلگە كوشىپ كەتكەن. ونىڭ ەڭ كوبى قازاقستانعا كەتكەن - 4128 ادام. ودان كەيىنگى ورىندا رەسەيدى تاڭداعاندار كوبىرەك بولدى (760 ادام).

2025 -جىلدىڭ 6 ايىندا وزبەكستانعا شەتەلدەن كوشىپ كەلگەندەردىڭ سانى 673 ادام بولدى. وتكەن جىلدىڭ سايكەس كەزەڭىندە بۇل كورسەتكىش 1800 بولعان.

شەتەلگە كوشۋ ءۇردىسى

2024 -جىلى 10842 وزبەكستاندىق تۇراقتى تۇرۋ ءۇشىن شەت ەلدەرگە كوشتى. ونىڭ ىشىندە قازاقستانعا 8 مىڭ 792 ادام، رەسەيگە 1 مىڭ 601 ادام كەتكەن. ەلدەن كەتكەندەر وڭتۇستىك كورەيا (96 ادام)، قىرعىزستان (73 ادام)، تۇركىمەنستان (39 ادام) جانە باسقا ەلدەردى (241 ادام) تاڭدادى.

2023 -جىلعى كورسەتكىش بويىنشا شەتەلگە قونىس اۋدارعاندار سانى 17336 ادامدى قۇراعان. اتاپ ايتقاندا، قازاقستانعا 14 مىڭ 51 ادام، رەسەيگە 2 مىڭ 670 ادام كوشىپ كەتكەن.

10 جىل بۇرىن ساندار الدەقايدا جوعارى بولدى. ماسەلەن، 2010 -جىلى وزبەكستاننان 44420، 2011 -جىلى 50816، 2012 -جىلى 45447 ادام كوشىپ كەتكەن. 2015 -جىلدان باستاپ كوشۋ ءۇردىسى ايتارلىقتاي تومەندەي باستادى، سول جىلى ەلدەن 31765 ادام كوشىپ كەتتى.

ەسكە سالا كەتەيىك، وزبەكستان حالقىنىڭ سانى 38 ميلليونعا جۋىقتادى.

اۆتور

بەگابات ۇزاقوۆ