وزبەكستاندا قانشا قازاق تۇرىپ جاتىر
استانا. KAZINFORM - قازاقستان مەن وزبەكستاننىڭ مادەني-گۋمانيتارلىق سالاداعى ىنتىماقتاستىق وڭىرلىك ساياساتتاعى نەگىزگى باسىم باعىتتاردىڭ ءبىرى. پرەزيدەنتتىڭ ءدال وسى ءسوزىن سەنات ءتوراعاسى ماۋلەن اشىمبايەۆ بۇگىن قازاق-وزبەك زيالى قاۋىمىنىڭ فورۋمىندا كەلتىردى.
- قازاقستان پرەزيدەنتى قاسىم-جومارت توقايەۆ وزبەكستانمەن مادەني-گۋمانيتارلىق سالاداعى ىنتىماقتاستىقتىڭ وڭىرلىك ساياساتتاعى نەگىزگى باسىمدىقتاردىڭ ءبىرى ەكەنىن بىرنەشە رەت اتاپ ءوتتى. اسا ماڭىزدى ءرولدى باۋىرلاس حالىق اراسىنداعى دوستىقتى قالىپتاستىراتىن جانە نىعايتاتىن ادامي بايلانىس اتقارادى. بۇگىندە قازاقستاندا 600 مىڭنان استام ەتنيكالىق وزبەك تۇرىپ جاتىر. مەملەكەت ولارعا انا ءتىلىن ۇيرەنۋىنە، مادەنيەتىن دامىتۋىنا جانە ءداستۇرىن ساقتاپ قالۋىنا بارلىق جاعدايدى جاساعان. وزبەك تىلىندەگى مەكتەپتەر، تەاترلار، ادەبي بىرلەستىكتەر، بۇقارالىق اقپارات قۇرالدارى تابىستى جۇمىس ىستەپ كەلەدى، - دەدى ماۋلەن اشىمبايەۆ ەلوردادا وتكەن قازاق-وزبەك زيالى قاۋىمىنىڭ العاشقى فورۋمىندا.
سپيكەر كەلتىرگەن مالىمەتكە سايكەس، بۇگىندە وزبەكستان 800 مىڭنان استام قازاق ءۇشىن تۋعان شاڭىراققا اينالىپ وتىر.
- وزبەكستاندا رەسپۋبليكالىق قازاق مادەني ورتالىعى جۇمىس ىستەيدى، قازاق ءتىلىن وقىتۋ جانە ۇلتتىق ءداستۇردى ساقتاۋ باعدارلاماسى جۇزەگە اسىرىلىپ جاتىر. مادەنيەتپەن الماسۋ مەن ىنتىماقتاستىقتى نىعايتا تۇسۋدە جاستارعا ەرەكشە ءرول جۇكتەلەدى. قازىر ەكى ەلدىڭ جاستارى فورۋمدا عانا ەمەس، كۇندەلىكتى الەۋمەتتىك جەلىلەردە، ونلاين-جوبالاردا، بىرلەسكەن شىعارماشىلىق جانە ستارتاپ-باستامالار ارقىلى ارالاسادى. سپورتشىلارىمىزعا بىرگە جانكۇيەر بولىپ، ءبىر-ءبىرىنىڭ جەڭىسىنە شىن جۇرەكتەن قۋانادى. وزبەكستان قۇراماسى تاريحتا العاش رەت فۋتبولدان الەم چەمپيوناتىنىڭ فينالدىق كەزەڭىنە شىققاندا، مىڭداعان قازاقستاندىق وزبەك اعايىننىڭ قۋانىشىمەن قۇتتىقتاپ، قولداۋ كورسەتتى. بۇل شىنايى ءوزارا قولداۋ، بىرلىكتىڭ ايقىن دالەلى. سوندىقتان بىرلەسكەن ءبىلىم بەرۋ باعدارلامالارىن ىسكە اسىرۋ، ءوزارا تاجىريبە الماسۋ، كرەاتيۆتى جانە IT- جوبالاردى كەڭەيتۋ ماڭىزدى. جىل سايىن قازاقستان مەن وزبەكستان جاستارىنىڭ كونگرەسى وتەدى، بىرنەشە كۇن بۇرىن (14-15-تامىزدا) تاشكەنت قالاسىندا كەزەكتى كونگرەسس ۇيىمداستىرىلدى، - دەيدى ءتوراعا.
بۇگىن استانادا قازاق-وزبەك زيالى قاۋىمىنىڭ العاشقى فورۋمى ءوتتى. العاش ۇيىمداستىرىلعان فورۋمعا سەنات ءتوراعاسى ماۋلەن اشىمبايەۆ جانە وزبەكستان ولي ءماجىلىسى سەناتىنىڭ ءتوراعاسى تانزيلا ناربايەۆا باستاعان قازاق-وزبەك عىلىمي-شىعارماشىلىق زيالى وكىلدەرى قاتىستى.
بۇعان دەيىن سەنات ءتوراعاسى ماۋلەن اشىمبايەۆ قازاقستان مەن وزبەكستان قارىم-قاتىناسى بۇرىن-سوڭدى بولماعان بيىك دەڭگەيگە كوتەرىلگەنىن باسا ايتقان ەدى.
ايتا كەتەيىك، كەشە پرەزيدەنت قاسىم-جومارت توقايەۆ وزبەكستان ولي ءماجىلىسى سەناتىنىڭ ءتوراعاسى تانزيلا ناربايەۆانى قابىلدادى.
