وزبەكستاندا ۇلى ابايدىڭ 180 جىلدىعى اتالىپ وتەدى
تاشكەنت. KAZINFORM - بيىل اباي قۇنانباي ۇلىنىڭ 180 جىلدىعى وزبەكستاندا كەڭ اۋقىمدا اتالىپ وتپەك، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
بۇل تۋرالى Kazinform تىلىشسىنە سۇحبات بەرگەن وزبەكستان جازۋشىلار وداعىنا قاراستى قازاق ادەبيەتى كەڭەسىنىڭ ءتوراعاسى ءتۇرسىنالى احمەتوۆ ءمالىم ەتتى.
- بيىل اباي قۇنانباي ۇلىنىڭ 180 جىلدىعىن جوعارى دەڭگەيدە اتاپ ءوتۋ جوسپارلانىپ وتىر. ءتيىستى ءىس- شارالاردىڭ ءتىزىمى بەكىتىلىپ جاتىر. بۇعان قاتىستى قازاق ادەبيەتى كەڭەسى ءوزىنىڭ قاجەتتى ۇسىنىسىن ەنگىزدى، - دەپ توقتالدى ءتۇرسىنالى احمەتوۆ.
ول اتاپ وتكەندەي، بيىل وزبەكستان وڭىرلەرىندە عىلىمي- تاجىريبەلىك كونفەرەنتسيا، جىر ءمۇشايرالارى مەن ءتۇرلى بايقاۋلار ۇيىمداستىرىلادى.
- اتاپ ايتقاندا، اباي قۇنانباي ۇلىنىڭ ەڭبەكتەرىن ناسيحاتتاۋ ماقساتىندا وقۋشىلار مەن جاستار اراسىندا ءتۇرلى كونكۋرستار ۇيىمداستىرىلادى. مۇنىمەن بىرگە، جىر ءمۇشايراسى جانە حالىقارالىق اقىندار ايتىسى وتكىزىلەدى، - دەدى ءتۇرسىنالى احمەتوۆ Kazinform ءتىلشىسىنىڭ ساۋالىنا جاۋاپ بەرە وتىرىپ.
ەسكە سالايىق، بيىل ەلىمىزدە حاكىم ابايدىڭ 180 جىلدىق مەرەيتويى اتالىپ وتەدى.
بۇعان قوسا، بىلتىر وزبەكستاندا ءبىرقاتار قازاق جازۋشىسىنىڭ مەرەيتويى اتالىپ ءوتتى.
مۇنىمەن قاتار، 2024 -جىلى وزبەكستانداعى قازاق قالامگەرلەرىنىڭ 20 عا تارتا كىتابى جارىق كورىپ، ءۇش قانداسىمىز كورشىلەس ەلدىڭ جازۋشىلار وداعىنا مۇشە اتاندى.
