وزبەكستاندا پارلامەنت سايلاۋى ءوتىپ جاتىر

تاشكەنت. KAZINFORM - وزبەكستاندا ساعات 8.00-دە زاڭ شىعارۋ پالاتاسىنا (پارلامەنتتىڭ تومەنگى پالاتاسى) جانە وبلىس، قالا مەن اۋدان كەنگاشتارىنىڭ دەپۋتاتتارىن سايلاۋ باستالدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

ءبىرىنشى بولىپ جاپونيا مەن وڭتۇستىك كورەياداعى ەلشىلىكتەر جانىنان قۇرىلعان سايلاۋ ۋچاسكەلەرى اشىلدى. جالپى ۋچاسكەلەر سانى - 10 717، ونىڭ 56 سى 39 شەت مەملەكەتتە. داۋىس بەرۋ 20:00-گە دەيىن جالعاسادى.

ايتا كەتسەك، بيىل پارلامەنت سايلاۋى تۇڭعىش رەت پروپورتسيونالدى- ماجوريتارلىق جۇيەمەن وتەدى. پارتيالارعا سايلاۋالدى ۇگىت- ناسيحاتتى 26 شىلدەدەن باستاپ جۇرگىزۋگە رۇقسات ەتىلدى.

16-23-قازان ارالىعىندا مەرزىمىنەن بۇرىن داۋىس بەرۋ ۇيىمداستىرىلدى، وندا سايلاۋشىلار تىزىمىنە ەنگىزىلگەن 19,9 ميلليون وزبەكستاندىقتىڭ 1 ميلليوننان استامى ءوز تاڭداۋىن جاسادى.

ەسكە سالساق، پارلامەنت سايلاۋىنا 5 پارتيا قاتىسىپ جاتىر: وزبەكستاننىڭ ليبەرالدىق-دەموكراتيالىق پارتياسى، وزبەكستاننىڭ ەكولوگيالىق پارتياسى، حالىقتىق- دەموكراتيالىق پارتيا، «ميللي تيكلانيش» دەموكراتيالىق پارتياسى جانە «ادولات» سوتسيال-دەموكراتيالىق پارتياسى.

بۇعان دەيىن حابارلاعانىمىزداي، وزبەكستانداعى پارلامەنت سايلاۋىندا كەيبىر ۋچاسكەلەرگە ەلەكتروندىق داۋىس بەرۋ جۇيەسى ەنگىزىلدى.

اۆتور
ءاليحان اسقار