اتىراۋ ۋنيۆەرسيتەتىنىڭ اپاتتى جاتاقحاناسىنىڭ ءبىر بولىگى وپىرىلىپ قۇلادى
اتىراۋ. KAZINFORM - ح. دوسمۇحامەدوۆ اتىنداعى اتىراۋ ۋنيۆەرسيتەتىنىڭ اپاتتى دەپ تانىلعان جاتاقحاناسىنىڭ ءبىر بولىگى قۇلاپ قالدى. جاتاقحانا بۇگىن، 22-ساۋىردە قۇلاعان. بۇل - ستۋدەنتتەر تۇرمايتىن جاتاقحانا.
جوعارى وقۋ ورنىنىڭ باسپا ءسوز قىزمەتى جاتاقحانانىڭ قۇلاپ قالعانىن راستادى. اپاتتى دەپ تانىلعان 2-جاتاقحانانىڭ 5-قاباتتى عيماراتى 1972 -جىلى سالىنعان.
- ۋنيۆەرسيتەتتىڭ شارۋاشىلىق ءبولىمى 2022 -جىلدىڭ قاراشا ايىندا 2-جاتاقحاناداعى 1-قاباتىنىڭ قابىرعاسىندا اقاۋدىڭ پايدا بولعانىن انىقتادى. وسى جاعداي انىقتالعان سوڭ مەملەكەتتىك ساتىپ الۋ پورتالى ارقىلى جاتاقحانانىڭ تەحنيكالىق قاۋىپسىزدىگىنە ساراپتاما جۇرگىزۋگە كونكۋرس جاريالاندى. 2023 -جىلعى 21-اقپانداعى 138-كەلىسىمشارتقا سايكەس «PFA compani» ج ش س تەحنيكالىق زەردەلەۋ جۇمىستارىن جۇرگىزىپ، عيماراتتىڭ اپاتتى جاعدايدا ەكەنى راستالدى. ستۋدەنتتەردىڭ ءبارى باسقا جاتاقحانالارعا كوشىرىلىپ، ورنالاستىرىلدى، - دەپ حابارلادى ۋنيۆەرسيەتتىڭ باسپا ءسوز قىزمەتى.
اتىراۋ وبلىسىنىڭ قۇرىلىس باسقارماسى ۋنيۆەرسيتەتتىڭ اپاتتى جاعدايداعى ەكى جاتاقحاناسىنىڭ عيماراتىن بۇزۋ، ستۋدەنتتەرگە ارنالعان 1000 ورىندىق جاڭا جاتاقحانا سالۋ ءۇشىن جوبالىق-سمەتالىق قۇجاتتاما دايىنداعان. جاڭا نىساننىڭ جوبالاۋشىسى - «اۆانگارد وك» ج ش س. جوبا ساراپتامادان وتۋگە جولدانعان.
- اپاتتى دەپ تانىلعان 2-جاتاقحانانىڭ اينالاسى قورشالعان. جاتاقحانانىڭ قۇلاعانىنان ەشكىم زارداپ شەككەن جوق، - دەپ ءمالىم باسپا ءسوز قىزمەتىنەن.
ەسكە سالا كەتەيىك، بۇعان دەيىن ەلورداداعى مۇڭايتپاسوۆ ستاديونى مەن «قازاقستان» سپورت سارايىنىڭ قۇرىلىسى قاشان اياقتالاتىنى حابارلانعان ەدى.
اۆتور
جولداسبەك شوپەعۇل
