وزبەكستاندا 3 جىلدا كاسىپورىندار سانى 100 مىڭعا جۋىق قىسقاردى

تاشكەنت. KAZINFORM - سوڭعى ءۇش جىلدا وزبەكستانداعى بيزنەس ورتا ايتارلىقتاي وزگەرىستەرگە ۇشىرادى، ناتيجەسىندە جۇمىس ىستەپ تۇرعان كاسىپورىندار سانى ايتارلىقتاي قىسقاردى، دەپ حابارلايدى Upl.uz.

2022 -جىلى وزبەكستاندا 542672 كاسىپورىن جۇمىس ىستەسە، 2025 -جىلدىڭ ساۋىرىنە قاراي ولاردىڭ سانى 442402 گە دەيىن ازايدى.

وسىلايشا ەل ەكونوميكاسى 100 مىڭعا جۋىق زاڭدى تۇلعادان ايىرىلدى. ەڭ ەلەۋلى قىسقارتۋلار ونەركاسىپ سەكتورىندا (%38 عا) جانە قۇرىلىس يندۋسترياسىندا (%37 عا) بايقالدى. تومەندەۋ ءۇردىسى %16 عا وسكەن دەنساۋلىق ساقتاۋ مەن الەۋمەتتىك قىزمەتتەردى قوسپاعاندا، ەكونوميكانىڭ بارلىق سەكتورلارىنا اسەر ەتتى.

ءبىر قىزىعى، شارۋاشىلىق جۇرگىزۋشى سۋبەكتىلەر سانىنىڭ قىسقارۋىنا قاراماستان، اتالمىش كەزەڭدە تاۋارلار مەن كورسەتىلگەن قىزمەتتەر ءوندىرىسىنىڭ جالپى كولەمى ايتارلىقتاي وسكەنىن كورسەتتى. مىسالى، 2022 -جىلدىڭ ءبىرىنشى توقسانىندا 92064 ونەركاسىپتىك كاسىپورىن 114 تريلليون سۋمدىق(1 ا ق ش دوللارى - 12943,72 سۋم) ءونىم ءوندىردى. 2025 -جىلعا قاراي نەبارى 56321 ونەركاسىپتىك كومپانيامەن بۇل كورسەتكىش 211 تريلليون سۋمعا جەتتى.

ەسكە سالا كەتەيىك، وزبەكستاندا جىل باسىنان بەرى 4,7 مىڭ ادام باس بوستاندىعىنان ايىرىلدى.