وزبەكستاندا 2030 -جىلى ەلەكتر ەنەرگياسىن تۇتىنۋ كولەمى ەكى ەسە ارتپاق

استانا. KAZINFORM - وزبەكستان ەنەرگەتيكا ءمينيسترى جۋرابەك ميرزاماحمۋدوۆ ورتالىق ازيا ەلدەرى جانە ازەربايجان ەنەرگەتيكا مينيسترلەرىنىڭ كەزدەسۋىندە تاشكەنت كورشى ەلدەردەن ەلەكتر قۋاتىن ساتىپ الۋعا ىنتالى ەكەنىن ءمالىم ەتتى.

«وزبەكستاندا ەلەكتر قۋاتىن تۇتىنۋ كولەمى جىل سايىن ورتا ەسەپپەن %5-6 ءوسىپ كەلەدى. 2019 -جىلدان بەرى ەلدە ەلەكتر قۋاتىن تۇتىنۋ كولەمى 65 ميلليارد ك ۆت/ساعاتتان 81 ميلليارد ك ۆت- ساعاتقا دەيىن ءوستى. ال 2030 -جىلعا قاراي بۇل شاما كەمىندە ەكى ەسە ارتىپ، 134 ميلليارد ك ۆت/ساعاتقا جەتەدى. قازاقستانمەن گاز، مۇناي، مۇناي ونىمدەرى مەن ەلەكتر قۋاتىن جەتكىزۋ جانە ترانزيتتەۋ، جيىلىكتەردى رەتتەۋ ماسەلەلەرى بويىنشا تىعىز جۇمىس ىستەپ وتىرمىز»، - دەدى وزبەكستاندىق مينيستر.

وزبەكستان وكىلى ورتالىق ازيانىڭ وزگە ەلدەرىمەن ەنەرگەتيكا سالاسىندا بىرلەسىپ ىسكە اسىرىپ جاتقان جوبالارعا توقتالىپ، بۇل باعىتتاعى ىقپالداستىقتى ودان ءارى نىعايتۋعا مۇددەلى ەكەندەرىن جەتكىزدى.

«ول ءۇشىن ەنەرگەتيكا سالاسىنداعى رەفورمالار تۋرالى اقپارات الماسۋعا ارنالعان، تۇراقتى جۇمىس ىستەپ تۇراتىن ورتاق پلاتفورما قۇرۋدى ۇسىنامىن. بىزگە ەلەكتر قۋاتى مەن ەنەرگەتيكالىق رەسۋرستار ساۋداسىنىڭ ينفراقۇرىلىمىن جەتىلدىرىپ، ترانزيتتىك الەۋەتتەرىمىز ارتتىرۋ كەرەك. مامان دايارلاۋ سالاسىنداعى ارىپتەستىكتى جالعاستىرۋدى ۇسىنامىن»، - دەدى جۋرابەك ميرزاماحمۋدوۆ.

اۆتور
ەربول جانات