وزبەكستان سۋدى ۇنەمدەۋ ءۇشىن توتەنشە جۇمىس رەجيمىنە كوشەدى

وزبەكستان سۋدى ۇنەمدەۋ ءۇشىن كەلەر جىلى توتەنشە جۇمىس رەجيمىنە كوشەدى. بۇل تۋرالى سۋ رەسۋرستارىن ءتيىمدى پايدالانۋ شارالارىنا ارنالعان كەڭەستە وزبەكستان پرەزيدەنتى شاۆكات ميرزيەيەۆ ءمالىم ەتتى، دەپ حابارلايدى President.uz.

جيىن بارىسىندا وزبەكستاندا ىشكى كوزدەر سۋ قاجەتتىلىگىنىڭ 20 پايىزىن عانا جاباتىنى ايتىلدى. كليماتتىڭ وزگەرۋىن جانە ترانسشەكارالىق وزەندەردى ءتيىمدى پايدالانۋداعى ماسەلەلەردى ەسكەرە وتىرىپ، 2030-جىلعا قاراي رەسپۋبليكادا سۋدىڭ جىلدىق تاپشىلىعى 15 ميلليارد تەكشە مەترگە جەتەدى دەپ بولجانىپ وتىر.

سۋدىڭ 90 پايىزى اۋىل شارۋاشىلىعىنا باعىتتالادى. وسى رەتتە ونىڭ ايتارلىقتاي بولىگى ىسىراپ بولادى. سازدان جاسالعان سۋارۋ جۇيەلەرىندە جىل سايىن 14 ميلليارد تەكشە مەتر سۋ كەتەدى. بۇل كولەم جالپى تۇتىنۋ مولشەرىنىڭ 36 پايىزىنا تەڭ. وسىنىڭ كەسىرىنەن ارنالار شەتىندەگى 175 مىڭ گەكتار القاپقا سۋ جەتىپەي قالادى. ودان 5 ميلليارد دوللار ەكونوميكالىق شىعىن كەلەدى.

سۋدى ۇنەمدەۋ ءۇشىن ارنالار مەن ارىقتارعا بەتون قۇيۋ ءبىرىنشى كەزەكتەگى مىندەت بولماق. كەلەر جىلى 1,5 مىڭ شاقىرىم، ياعني، بيىلعىدان 4 ەسەگە ارتىق سۋ ارناسىنا بەتون قۇيىلادى. ال، 2025-جىلى وسىنداي جۇمىستارمەن كەم دەگەندە 2 مىڭ شاقىرىم اۋماق قامتىلادى.

ەكىنشى ماڭىزدى مىندەت - سۋ ۇنەمدەيتىن تەحنولوگيالاردى ەنگىزۋ. قازىر 4,3 ميلليون گەكتار سۋارمالى القاپتىڭ 30 پايىزىندا عانا سۋدى ىسىراپسىز پايدالانۋعا مۇمكىندىك بەرەتىن قۇرىلعىلار ورناتىلعان. وعان قولبايلاۋ بولىپ وتىرعان ماسەلەنىڭ ءبىرى - اتالعان ۇنەمدەۋ تەحنولوگياسىن ەنگىزگەن شارۋالارعا نەسيەنىڭ ءبىر بولىگىن وتەيتىن مەحانيزىمنىڭ جوقتىعى. سوندىقتان جيىندا قارجىلاندىرۋدىڭ جاڭا جۇيەسى ايقىندالدى. وسىلايشا، سۋ ۇنەمدەۋ تەحنولوگيالارىن ەنگىزۋگە نيەت بىلدىرگەن كلاستەرلەر مەن شارۋا قوجالىقتارى ءۇشىن 2 جىلدىق جەڭىلدىكتى كەزەڭمەن، %14 جىلدىق مولشەرلەمەمەن 5 جىلعا نەسيە بەرىلەدى.

ءۇشىنشى ماڭىزدى مىندەت - سۋدى جەتكىزۋ شىعىندارىن ازايتۋ. اتاپ ايتقاندا، تۇتىناتىن سۋدىڭ 63 پايىزى سورعى ستانتسيالارى ارقىلى الىنادى. كەڭەستە ءمالىم بولعانداي، ولاردىڭ توزۋ دەڭگەيى 80 پايىزعا دەيىن جەتكەن. وزبەكستان باسشىسى شىعىندى ازايتۋدىڭ جانە تيىمدىلىكتى ارتتىرۋدىڭ ەڭ دۇرىس جولى سورعى قۇرىلعىلارىن جاڭارتۋ جانە ولاردى باسقارۋدى جەكە سەرىكتەستىككە بەرۋ ەكەنىن باسا ايتتى.