وزبەكستان پرەزيدەنتى گازاداعى جاعدايعا قاتىستى پىكىر ءبىلدىردى
تاشكەنت. KAZINFORM - تاشكەنت حالىقارالىق ينۆەستيتسيا فورۋمىندا ءسوز سويلەگەن وزبەكستان پرەزيدەنتى شاۆكات ميرزيەۆ گازاداعى جاعدايعا الاڭداۋلى ەكەنىن مالىمدەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
- 21-عاسىردا ءبىزدىڭ كوز الدىمىزدا كوپتەگەن جازىقسىز ادامداردىڭ اجال قۇشىپ جاتقانىن ەشقانداي سەبەپ نە جاعداي اقتاي المايدى. بۇل قاقتىعىستىڭ جالعىز شەشىمى – ب ۇ ۇ جارعىسى جانە حالىقارالىق قۇقىق تالاپتارى ارقىلى ءادىل رەتتەۋ. پالەستينا حالقى ءوزىنىڭ تاۋەلسىز مەملەكەتىنە يە بولۋعا حاقىلى، - دەدى ش. ميرزيەۆ.
سونىمەن قاتار وزبەكستان پرەزيدەنتى ۋكرايناداعى جاعداي توڭىرەگىندە باستالعان كەلىسسوزدەر ناتيجە بەرەتىنىنە سەنىم ءبىلدىردى.
- ۋكراينا اينالاسىنداعى جاعداي تەك ديپلوماتيالىق جولمەن شەشىلۋى كەرەك. وسى رەتتە وزبەك تاراپى رەسەي مەن ۋكراينا اراسىندا باستالعان كەلىسسوزدەردى قۇپتايدى، - دەپ توقتالدى كورشىلەس ەل پرەزيدەنتى.
شاۆكات ميرزيەۆ ايماقتاعى احۋال جايلى ايتا كەلە، اۋعانستانداعى جاعدايعا نازار اۋداردى. ول رەسمي كابۋلدى حالىقارالىق ارەنادان وقشاۋ قالدىرۋعا بولمايتىنىن جەتكىزدى.
- ءبىز بۇل ەلدىڭ قازىرگى بيلىگىمەن سىندارلى ديالوگ جۇرگىزىپ، اۋعانستاننىڭ وقشاۋلانۋىنا جول بەرمەۋ اسا ماڭىزدى دەپ سانايمىز. اتالعان مەملەكەتتە بەيبىتشىلىكتىڭ ورناۋى جانە ونىڭ ەكونوميكالىق ىلگەرىلەۋى بارلىق ىرگەلەس ەلدەردىڭ ۇزاق مەرزىمدى دامۋى ءۇشىن قاجەتتى فاكتور، - دەپ اتاپ ءوتتى ول.
شاۆكات ميرزيەۆتىڭ سوزىنشە، بۇگىندە حالىقارالىق قۇقىق نورمالارى مەن ديپلوماتيانىڭ كۇشى السىرەي باستادى. وزبەكستان باسشىسى ادامزات ءۇشىن ماڭىزدى ماسەلەلەر كەيىنگى ورىنعا سىرعىپ، مەملەكەتتەر قارۋلانۋعا كوشكەنىن اتاپ ءوتتى.
- الەمدە قارۋلانۋ ءۇردىسى قايتا قارقىن الدى. ماسەلەن، ءىرى دەرجاۆالاردىڭ اسكەري شىعىندارى 2010 -جىلدان بەرى 1,5 ەسە ءوسىپ، 2,5 تريلليون دوللارعا جەتتى. بۇل رەتتە جاھاندىق جالپى ىشكى ءونىمنىڭ ءوسىمى ءۇشىنشى جىل قاتارىنان تومەندەپ بارادى، - دەپ مالىمدەدى وزبەكستان پرەزيدەنتى.
ەسكە سالايىق، قازىرگى ۋاقىتتا وزبەكستان استاناسىندا تاشكەنت حالىقارالىق ينۆەستيتسيا فورۋمى ءوتىپ جاتىر. ءىس- شاراعا 3 مىڭنان اسا شەتەلدىك مارتەبەلى مەيمان قاتىسىپ وتىر. بىرەر ساعات بۇرىن كورشىلەس ەلگە پرەمەر-مينيستر ولجاس بەكتەنوۆ جۇمىس ساپارىمەن كەلىپ، فورۋمدا ءسوز سويلەدى.
اۆتور
ءاليحان اسقار
