وزبەكستان پرەزيدەنتى اكىمشىلىگىنىڭ باسشىسى سايدا ميرزيەيەۆاعا جاڭا وكىلەتتىك بەرىلدى
تاشكەنت. KAZINFORM - وزبەكستان پرەزيدەنتى شاۆكات ميرزيەيەۆتىڭ «مەملەكەتتىك باسقارۋ جۇيەسىندەگى تيىمدىلىك پەن ناتيجەنى ارتتىرۋعا باعىتتالعان شارالار تۋرالى» جارلىعىنا ساي، سايدا ميرزيەيەۆاعا جاڭا وكىلەتتىلىك بەرىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
قۇجاتتا جازىلعانداي، پرەزيدەنت اكىمشىلىگىندەگى كادر، ۇيىمداستىرۋ جانە ساراپتاما ماسەلەلەرى بويىنشا نەگىزگى وكىلەتتىكتەر سايدا ميرزيەيەۆاعا ءوتتى. تيىسىنشە، وعان پرەزيدەنت كەڭەسشىلەرى مەن اكىمشىلىككە قاراستى بولىمشە باستىقتارىنىڭ ورىنباسارلارىن، حاتشىلىقتىڭ جەتەكشىسىن جانە وزگە دە باسشىلىق لاۋازىمداعى تۇلعالاردى قىزمەتىنەن بوساتۋ نەمەسە تاعايىنداۋ قۇقىعى بەرىلدى.
بۇدان باسقا، پرەزيدەنت اكىمشىلىگىنىڭ باسشىسى دامۋ ستراتەگيالارى مەن باعدارلامالاردى جۇزەگە اسىرۋ ءۇشىن وتاندىق جانە شەتەلدىك ماماندار مەن ساراپشىلاردى تارتۋعا قۇقىلى. ولارعا ۇسىنىلاتىن ەڭبەكاقى مولشەرىن جانە ونى قانداي ۆاليۋتادا تولەيتىنىن سايدا ميرزيەيەۆا ءوزى شەشەدى.
شاۆكات ميرزيەيەۆتىڭ جارلىعىنا سايكەس، سايدا ميرزيەيەۆاعا ەكى اپتانىڭ ىشىندە پرەزيدەنت اكىمشىلىگى قىزمەتكەرلەرىنىڭ جۇمىسىن باعالاۋ، ولاردى اتتەستاتسيادان وتكىزۋ جانە قابىلەتتى كادرلاردى ىرىكتەۋ مىندەتى جۇكتەلدى.
شاۆكات ميرزيەيەۆتىڭ كەڭەسشىلەرى مەن پرەزيدەنت اكىمشىلىگىنە قاراستى قۇرىلىمدىق بولىمشەلەردىڭ جەتەكشىلەرى 10 كۇن ىشىندە جاۋاپتى سالالارىن دامىتۋ بويىنشا ۇسىنىس ازىرلەپ، جوسپاردى سايدا ميرزيەيەۆانىڭ قاراۋىنا ەنگىزۋى ءتيىس.
ەسكە سالايىق، بىرنەشە كۇن بۇرىن وزبەكستان باسشىسى پرەزيدەنت اكىمشىلىگىنىڭ جاڭا قۇرىلىمىن بەكىتتى. وعان ساي، ەندى پرەزيدەنت اكىمشىلىگى باسشىسىنىڭ 5 ورىنباسارى بولادى. ولار ءبىلىم بەرۋ، كاسىپكەرلىك سالا، سوت-قۇقىق جۇيەسى، دەنساۋلىق ساقتاۋ مەن سۋ رەسۋرستارى باعىتتارىنداعى جوبالاردىڭ ىسكە اسۋىن قاداعالايدى.
مۇنىمەن بىرگە، ستراتەگيالىق دامۋ جانە سىرتقى ساياسات جونىندەگى پرەزيدەنت كەڭەسشىلەرى لاۋازىمى ەنگىزىلدى.
سونداي-اق، قارجى تەحنولوگيالارى، سيفرلاندىرۋ جانە جاساندى ينتەللەكت، كرەاتيۆتى ەكونوميكا، قوعامدىق قاۋىپسىزدىك، پرەزيدەنتتىڭ ايماقتارعا جاسايتىن ساپارلارىنا وراي تالداۋ ماتەريالدارىن ازىرلەيتىن كوممۋنيكاتسيالار دەپارتامەنتتەرى قۇرىلدى.
ەسكە سالايىق، بيىل 23-ماۋسىمدا شاۆكات ميرزيەيەۆتىڭ جارلىعىمەن پرەزيدەنت اكىمشىلىگىنىڭ باسشىسى لاۋازىمى قايتا جاساقتالدى. تيىسىنشە، ونى بۇرىن مەملەكەت باسشىسىنىڭ كومەكشىسى بولعان سايدا ميرزيەيەۆا يەلەندى.
ناقتىلاي كەتەيىك، شاۆكات ميرزيەيەۆ 2023-جىلدىڭ تامىزىندا وزبەكستان پرەزيدەنتى اكىمشىلىگىنىڭ قۇرىلىمىنا رەفورما جاسادى. كەيىن پرەزيدەنت اكىمشىلىگىنىڭ باسشىسى لاۋازىمى جويىلدى. سايكەسىنشە، پرەزيدەنت كومەكشىلەرىنىڭ قاتارى كوبەيدى. 2022-2023-جىلدار ارالىعىندا پرەزيدەنت اكىمشىلىگىن ساردور ۋمۋرزاكوۆ باسقارعان ەدى.
