وزبەكستان قازاقستانعا كەلۋگە نيەتتى ءوز ازاماتتارىنا قاتىستى ۇندەۋ جاسادى
تاشكەنت. KAZINFORM - وزبەكستاننىڭ سىرتقى ىستەر مينيسترلىگى قازاقستانعا بارۋدى جوسپارلاپ وتىرعان ازاماتتارعا قاتىستى ۇندەۋ جاساپ، كورشىلەس ەلدىڭ زاڭدارىن قاتاڭ ساقتاۋعا شاقىردى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
قازاقستانعا كەلۋ تارتىپتەرىنىڭ وزگەرۋىنە بايلانىستى ۆەدوسمستۆو وزبەكستاندىقتاردان جەكە باسىن كۋالاندىراتىن قۇجاتتاردى ۇنەمى وزىمەن بىرگە الىپ ءجۇرۋىن، سونداي-اق ارنايى رەسمي سەرۆيستەر ارقىلى وزىنە قاتىستى دەرەكتەردى تەكسەرۋگە ۇندەدى.
«وزبەكستان- قازاقستان نەمەسە رەسەي- قازاقستان شەكاراسىن كەسىپ ءوتۋ كەزىندە تەك قازاقستانعا ەمەس، سونىمەن بىرگە رەسەيگە دە كىرۋگە شەكتەۋ جوق ەكەنىنە الدىن الا كوز جەتكىزۋ ماڭىزدى. «اكىمشىلىك جانە قىلمىستىق ىستەر بويىنشا شەشىمدەردى ءوزارا تانۋ جانە ورىنداۋ تۋرالى» رەسەي مەن قازاقستان اراسىنداعى كەلىسىمگە ساي، قازاقستاندىق قۇزىرەتتى ورگاندار رەسەيدىڭ كوشى-قون جانە وزگە دە زاڭناماسىن بۇزعانداردى نەمەسە تولەنبەگەن ايىپپۇلداردىڭ بار-جوعىن تەكسەرە الادى. ەگەر جوعارىدا اتالعان تالاپتاردىڭ ءبىرى ساقتالماعان جاعدايدا قازاقستان بيلىگى وزبەكستان ازاماتىنىڭ ەلگە كىرۋىنە نەمەسە ودان شىعۋىنا جول بەرمەۋ شەشىمىن قابىلداۋى مۇمكىن»، - دەلىنگەن وزبەكستاننىڭ سىرتقى ىستەر مينيسترلىگى تاراتقان حابارلامادا.
وسىعان بايلانىستى وزبەكستاندىقتارعا قازاقستان جانە رەسەيگە بارۋ كەزىندە ماسەلە تۋىنداماسى ءۇشىن رەسەي فەدەراتسياسى ءى ءى م كوشى-قون ماسەلەلەرى جونىندەگى باس باسقارماسىنىڭ سايتىنان وزدەرىنە قاتىستى شەكتەۋدىڭ بار-جوعىن تەكسەرىپ الۋ ۇسىنىلدى.
ەسكە سالايىق، 1-مامىردان باستاپ قازاقستاننىڭ بۇكىل اۋەجايلارىندا قاۋىپسىزدىك شارالارى كۇشەيتىلدى.
اۆتور
ءاليحان اسقار
