وزبەكستان مەن تۇرىكمەنستان ءوزارا تاۋار اينالىمىن 2 ميلليارد دوللارعا جەتكىزبەك

سامارقاند. KAZINFORM - بۇگىن سامارقاند قالاسىندا وزبەكستان پرەزيدەنتى شاۆكات ميرزيەۆ پەن تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ كەلىسسوز جۇرگىزدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

تاراپتار كەزدەسۋىندە وزبەك-تۇرىكمەن قارىم-قاتىناسىن تەرەڭدەتە ءتۇسۋ مۇمكىندىكتەرى تالقىلاندى. اسىرەسە، ش. ميرزيەۆ پەن گ. بەردىمۇحامەدوۆ ءوزارا تاۋار اينالىمىن ارتتىرۋ جوبالارىنا دەن قويدى. ماسەلەن، بىلتىر قوس ەل اراسىنداعى ساۋدا-ساتتىق 1,1 ميلليارد دوللارعا تەڭەلدى. الداعى جىلدارى بۇل كولەمدى 2 ميلليارد دوللارعا جەتكىزۋ جوسپارلانىپ وتىر.

وزبەكستان پرەزيدەنتى مەن تۇرىكمەنستان حالك ماسلاحاتىنىڭ ءتوراعاسى وڭىرلىك ىنتىماقتاستىقتى ىلگەرىلەتۋگە باعىتتالعان باستامالارعا ايرىقشا توقتالدى. اتاپ ايتقاندا، تاراپتار «ورتالىق ازيا پليۋس +» فورماتىنداعى الداعى سامميتتەر مەن بيىل تاشكەنتتە وتەتىن ورتالىق ازيا مەملەكەتتەرى باسشىلارىنىڭ جەتىنشى كونسۋلتاتيۆتىك كەزدەسۋىندە كوتەرىلەتىن ماسەلەلەرگە قاتىستى پىكىر الماستى.

ەكىجاقتى كەلىسسوز اياقتالعان سوڭ ش. ميرزييەۆ گ. بەردىمۇحامەدوۆتى وزبەكستاننىڭ جوعارى مەملەكەتتىك ناگراداسى «وليي داراجالي دستليك» (جوعارى دارەجەلى دوستىق) وردەنىمەن ماراپاتتادى.

ەسكە سالايىق، بۇعان دەيىن تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ قازاقستاندا ساپارمەن بولىپ، مەملەكەت باسشىسى قاسىم-جومارت توقايەۆپەن بەيرەسمي كەزدەسۋ وتكىزدى.

كەيىن ول قىرعىزستانعا ساپارلاپ، پرەزيدەنت سادىر جاپاروۆپەن كەلىسسوز جۇرگىزدى.

اۆتور

ءاليحان اسقار