وزبەكستان مەن موڭعوليا ساۋدا- ساتتىق كولەمىن 5-10 ەسە ۇلعايتۋعا نيەتتى
تاشكەنت. KAZINFORM - موڭعوليا پرەزيدەنتى ۋحنااگيين حۋرەلسۋحتىڭ وزبەكستانعا جاساعان مەملەكەتتىك ساپارى بارىسىندا 14 قۇجاتقا قول قويىلدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
ۋحنااگين حۋرەلسۋحتىڭ وزبەكستانعا ساپارى «كوكساراي» رەزيدەنسياسىنداعى رەسمي كۇتىپ الۋ سالتاناتىنان باستالدى.
وزبەكستان پرەزيدەنتى شاۆكات ميرزيەۆ مارتەبەلى مەيماندى جىلى قارسى الدى. مەملەكەتتىك ءانۇراندار شىرقالدى، ارتىنشا ەكى ەل باسشىلارى رەسمي دەلەگاتسيا مۇشەلەرىمەن امانداستى.
سۋرەتكە ءتۇسۋ راسىمىنەن سوڭ مەملەكەت باسشىلارى كەلىسسوز وتكىزدى.
ونىڭ بارىسىندا ەلدەر اراسىنداعى ءوزارا ءتيىمدى ىنتىماقتاستىقتى ودان ءارى كەڭەيتۋ ماسەلەلەرى قارالدى. اتاپ ايتقاندا، موڭعوليا مەن وزبەكستان الداعى جىلدارى ءوزارا تاۋار اينالىمىن 5-10 ەسە ۇلعايتۋعا مۇددەلى. ول ءۇشىن سۇرانىسقا يە ونىمدەردىڭ ەكسپورتى مەن يمپورتىن ارتتىرۋ جوسپارلانىپ وتىر.
وسى ماقساتتا ەكى ەل ۇكىمەتىنە تاۋار اينالىمىن ۇلعايتۋ بويىنشا بىرلەسكەن جۇمىس توبىن قۇرۋ، ۇلان-باتىر مەن تاشكەنتتە رەسمي ساۋدا ۇيلەرىن اشۋ جانە پرەفەرەنسيالىق ساۋدا تۋرالى كەلىسىمنىڭ جوباسىن دايىنداۋ تاپسىرىلدى.
سونداي-اق، شاۆكات ميرزيەۆ ونەركاسىپتىك كووپەراتسيانىڭ ورتا مەرزىمدى باعدارلاماسىن قابىلداۋ تۋرالى باستاما كوتەردى. بۇل رەتتە تاراپتار ەڭ الدىمەن گەولوگيالىق بارلاۋ، شيكىزاتتى يگەرۋ جانە قايتا وڭدەۋ سالاسىنداعى ىنتىماقتاستىقتى ىلگەرىلەتۋگە مۇددەلى.
بۇعان قوسا پرەزيدەنتتەر «حالال» ستاندارتىنا ساي كەلەتىن ەت ونىمدەرىن شىعارۋ بويىنشا وندىرىستىك كلاستەر قۇرۋ باستاماسىنا قولداۋ ءبىلدىردى. مۇنىمەن بىرگە دايىن ءونىم شىعارۋ، ءجۇن مەن بىلعارىنى تەرەڭ وڭدەۋ باعىتتارىندا ماڭىزدى جوبالار ۇسىنىلدى. ول ءۇشىن ەكى ەلدىڭ عىلىمي-زەرتتەۋ ينستيتۋتتارى اراسىنداعى بايلانىستى دامىتۋ قاجەت ەكەندىگى اتاپ ءوتىلدى.
شاۆكات ميرزيەۆ پەن ۋحنااگين حۋرەلسۋح ەڭ ءتيىمدى ءارى قىسقا كولىك دالىزدەرىنە، سونىڭ ىشىندە قىرعىزستان مەن قىتاي ارقىلى وتەتىن مارشرۋتتارعا بىرلەسكەن تالداۋ جۇرگىزۋدى ۇسىندى.
وتكەن كەلىسسوز قورىتىندىسى بويىنشا ەكى ەل باسشىلارى بىرلەسكەن مالىمدەمەگە جانە مەملەكەتارالىق قاتىناس پەن ىنتىماقتاستىق تۋرالى 14 قۇجاتقا قول قويدى.
ودان كەيىن شاۆكات ميرزيەۆ پەن ۋحنااگين حۋرەلسۋح ەكى ەلدىڭ ءىرى كاسىپكەرلەرىمەن كەزدەسۋ وتكىزدى، مارتەبەلى مەيماندار اللەياسىنا اعاش وتىرعىزدى جانە تاشكەنتتەگى تەحنوپاركتىڭ جۇمىسىمەن تانىستى.
ەندى موڭعوليا پرەزيدەنتى حيۋا قالاسىنا بارىپ، وزبەك حالقىنىڭ باي مادەني-تاريحي مۇراسىمەن تانىسادى. ونىڭ وزبەكستانعا مەملەكەتتىك ساپارى 26-ماۋسىمعا دەيىن جالعاسادى.
ەسكە سالساق، ۋحنااگين حۋرەلسۋح كەيىنگى رەت وزبەكستانعا 2022 -جىلى قىركۇيەكتە ش ى ۇ مەملەكەت باسشىلارىنىڭ كەڭەسىنە قاتىسۋ ءۇشىن كەلگەن بولاتىن.
اۆتور
ءاليحان اسقار
