وزبەكستان شەكاراسىندا ايەل نەمەرەسىن زاڭسىز تاسىمال ءۇشىن پايدالانعان

تاشكەنت. KAZINFORM - وزبەكستاندىق كەدەنشىلەر قازاقستانمەن شەكاراداعى «مالىك» وتكىزۋ پۋنكتى ارقىلى وزبەك تاراپىنا التىننان جاسالعان زەرگەرلىك بۇيىمداردىڭ ءىرى پارتياسىن الىپ وتپەك بولعان ايەلدى انىقتادى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

وزبەكستان كەدەن كوميتەتىنىڭ باسپا ءسوز قىزمەتىنەن ءمالىم ەتكەندەي، شەكارا بەكەتى ارقىلى وتپەك بولعان ايەلدى تەكسەرۋ كەزىندە ونىڭ اياعىنا ورالعان 19 قاپتاما تابىلدى. ونىڭ ىشىنە گاۋھار تاستارمەن بەزەندىرىلگەن ءارى باعالى مەتالداردان جاسالعان 468 زەرگەرلىك بۇيىم جاسىرىلعان.

انىقتالعان ايەل 14 جاستاعى نەمەرەسىن دە زاڭسىز تاسىمال ءۇشىن پايدالانعان. كامەلەتكە تولماعان قىزدى تەكسەرۋ بارىسىندا ودان 454 زەرگەرلىك بۇيىم جاسىرىلعان 12 قاپتاما تابىلدى.

جالپى سانى 922 اشەكەيدىڭ سالماعى 6,7 كەلىدەن اسادى، ال ولاردىڭ قۇنى - 5,6 ميلليارد سۋم (شامامەن 213,8 ميلليون تەڭگە).

اۆتور
ءاليحان اسقار