وزبەكستان گازا سەكتورىنىڭ تۇرعىندارىنا كومەك رەتىندە 1,5 ميلليون دوللار بولەدى
وزبەكستان گازا سەكتورىنىڭ تۇرعىندارىنا كومەك رەتىندە بىرىككەن ۇلتتار ۇيىمىنىڭ تاياۋ شىعىستاعى اگەنتتىگىنە $1,5 ميلليون بولمەك. بۇل تۋرالى ەنەرگەتيكا جۇيەسىن كۇزگى جانە قىسقى ماۋسىمعا دايىنداۋعا ارنالعان جيىن بارىسىندا وزبەكستان پرەزيدەنتى شاۆكات ميرزيەيەۆ ايتتى، دەپ حابارلايدى Kazinform.
وزبەكستان پرەزيدەنتى باسپا ءسوز قىزمەتىنىڭ حابارلاۋىنشا، شاۆكات ميرزيەيەۆ كۇن تارتىبىنە قويىلىپ وتىرعان نەگىزگى ماسەلە تۋرالى ءسوز قوزعاماستان بىردەن بۇكىل الەمدى تولعاندىرىپ وتىرعان جاعدايعا كوشتى.
«يزرايل اسكەرى مەن حاماس قوزعالىسى اراسىنداعى قارۋلى قاقتىعىس گۋمانيتارلىق داعدارىستى ءورشىتتى، ەش كىناسى جوق بەيبىت تۇرعىندار اراسىندا ءولىم كوبەيدى. قۇربانداردىڭ اراسىندا ايەلدەر مەن بالالار دا بار، سونداي- اق وسى شيەلەنىس سالدارىنان تۇرعىندار باسپانالارىنان ايرىلىپ، تۋعان جەرىن تاستاپ كەتۋگە ءماجبۇر بولىپ وتىر. ءبىز پالەستينا مەن يزرايل تاراپىنان قۇربان بولعانداردىڭ بارلىعىنىڭ قايعىسىنا ورتاقتاسىپ، وتباسىلارىنا كوڭىل ايتامىز. مەن بىرىككەن ۇلتتار ۇيىمىنىڭ تاياۋ شىعىستاعى اگەنتتىگىنە گازا سەكتورىنىڭ تۇرعىندارىنا كومەك رەتىندە 1 ميلليون 500 مىڭ تەڭگە ءبولۋ تۋرالى شەشىم شىعاردىم. ءبىز پالەستينا حالقىمەن بىرگەمىز جانە ولاردىڭ بۇۇ قاۋىپسىزدىك كەڭەسى مەن باس اسسامبلەياسى قابىلداعان رەزوليۋتسيالار اياسىندا تاۋەلسىز مەملەكەت قۇرۋ جونىندەگى قۇقىقتارىن قولدايمىز»، - دەدى وزبەكستان پرەزيدەنتى.
سونداي-اق ول ەكى تاراپتى دا دەرەۋ تاتۋلاسىپ، قارۋلى قاقتىعىستاردى توقتاتۋعا، شيەلەنىستى بەيبىت جولمەن شەشۋگە شاقىردى.
ميرزيەيەۆ ورتالىق ازيا وڭىرىندە ءتۇرلى ۇلتتار مەن كونفەسسيا وكىلدەرىنىڭ تاتۋ-ءتاتتى ءومىر ءسۇرۋ تاجىريبەسى بار ەكەنىن اتاپ ءوتتى.
«بىرنەشە عاسىر بويى مۇندا ءوزارا سەنىم مەن دوستىقتا مۇسىلمان، حريستيان جانە يۋدەيلەر ءومىر ءسۇرىپ جاتىر. وسى مۇمكىندىكتى پايدالانا وتىرىپ، مەن ءوزىمىزدىڭ وتانداستارىمىزدى اسىرەسە جاستاردى ءتۇرلى ارانداتۋلارعا الدانىپ، زاڭسىز ارەكەتتەرگە بارماۋعا شاقىرعىم كەلەدى. ءبىز بىرلىك پەن ءوزارا تۇسىنىستىكتە ءوتىپ جاتقان بەيبىت تىنىش ءومىرىمىزدى ساقتاۋىمىز كەرەك، ول ءبىزدىڭ ەڭ باستى كۇشىمىز جانە باعا جەتپەس بايلىعىمىز»، - دەدى شاۆكات ميرزيەيەۆ.
