وزبەكستان اسكەرىندە دروننان تونەتىن قاۋىپتى تويتارۋعا جاۋاپتى بولىمشەلەر قۇرىلادى
تاشكەنت. KAZINFORM - وزبەكستان پرەزيدەنتى شاۆكات ميرزيەۆ ەلدىڭ قاۋىپسىزدىگىن نىعايتۋ مەن قورعانىس قاۋقارىن كۇشەيتۋ ماسەلەلەرى بويىنشا كەڭەس وتكىزدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ونىڭ بارىسىندا وزبەكستان باسشىسى اسكەردىڭ الەۋەتىن بۇگىندە بولىپ جاتقان قارۋلى قاقتىعىستاردى ەسكەرە وتىرىپ ارتتىرۋدىڭ ماڭىزىنا توقتالدى.
ياعني، قازىرگى ايماقتىق شيەلەنىستەردە جاساندى ينتەللەكتپەن جۇمىس ىستەيتىن تەحنولوگيالار، زىمىراندار مەن دروندار قولدانىلادى.
وسىعان بايلانىستى شاۆكات ميرزيەۆ دروندارعا قارسى ارەكەت ەتەتىن بولىمشەلەر جاساقتاۋدى تاپسىردى. مۇنىمەن بىرگە، پرەزيدەنت اتاپ وتكەندەي، وزبەكستان اسكەرىندە جاساندى ينتەللەكت پەن روبوتوتەحنيكانى قولدانا وتىرىپ، قاتەرلەردى تويتاراتىن كيبەرقاۋىپسىزدىك قۇرىلىمدارى بولۋى ءتيىس.
ەسكە سالايىق، بىلتىر جەلتوقساندا وزبەكستان پرەزيدەنتى قارۋلى كۇشتەر مەن قۇقىق قورعاۋ ورگاندارى قىزمەتكەرلەرىنىڭ جاۋىنگەرلىك ازىرلىگى مەن تيىمدىلىگىن ارتتىرۋعا باعىتتالعان زاڭعا قول قويدى.
قۇجاتقا ساي، اسكەري قىزمەتشىلەرمەن قۇقىق قورعاۋ ورگاندارى ماماندارىنىڭ قۇمار ويىن ويناۋىنا، شەتەل ازاماتتىعىن جانە ۋاقىتشا تۇرۋ ىقتيارحاتىن الۋ ءۇشىن ءوتىنىش بەرۋىنە شەكتەۋ قويىلدى.
اۆتور
ءاليحان اسقار
