پويىزداردىڭ كەشىگۋى ازايدى ما

استانا. KAZINFORM - «قازاقستان تەمىر جولى» ۇ ك» ا ق باسقارما ءتوراعاسى تالعات الدىبەرگەنوۆ پويىزداردىڭ كەشىگۋىنە تەمىرجولدىڭ توزۋى اسەر ەتىپ وتىرعانىن ايتتى.

- بۇل ماسەلە ءالى دە بار. ءبىراق جولاۋشىلار قاۋىپسىزدىگى جانە جولاۋشىلار پويىزىنىڭ كەستەسىن ساقتاۋ - ءبىزدىڭ باستى مىندەتىمىز، ياعني قاۋىپسىزدىككە ەرەكشە ەكپىن قويىلعان، - دەدى ت. الدىبەرگەنوۆ ۇكىمەت وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، قازىر تەمىرجولدىڭ توزۋى 57 پايىزدى قۇراپ وتىر. وسىنى ەسكەرە وتىرىپ، ءىرى كولەمدە جول جوندەۋ جۇمىستارى اتقارىلىپ جاتىر (جىلىنا 1400 شاقىرىم).

- قازىرگى كەزدە پويىزدار بويىنشا كەشىگۋدىڭ ازايۋى 37 پايىزدى قۇرادى، - دەدى ق ت ج باسشىسى.

بۇعان دەيىن تەمىرجول سالاسىنداعى ءىرى جوبالار قاشان پايدالانۋعا بەرىلەتىنىن جازعان ەدىك.

قازىرگى كەزدە 5 جوبا بويىنشا جاڭا قۇرىلىس جۇمىستارى ءجۇرىپ جاتىر. ولار: «دوستىق - مويىنتى»، «الماتى اينالما تەمىرجولى»، «داربازا - ماقتاارال»، «مويىنتى - قىزىلجار» جانە «باقتى - اياگوز». وسى جىلى مەرزىمىنەن بۇرىن ەكى ءىرى جوبا اياقتالادى: «دوستىق - مويىنتى» ۋچاسكەسى جانە الماتى اينالما تەمىرجولى.

بيىل شىلدە ايىندا كولىك ءمينيسترى نۇرلان ساۋرانبايەۆ كەشىگىپ كەلەتىن پويىزدار ماسەلەسىن شەشۋگە ينفراقۇرىلىم مەن ينۆەستيتسياعا بايلانىستى اۋقىمدى جۇمىستى ىسكە اسىرۋ كەرەك ەكەنىن ايتتى.