وڭىرلىك ستاندارتتار جۇيەسى: وسال ەلدى مەكەندەرگە باسا نازار اۋدارىلادى
استانا. KAZINFORM - قانات بوزىمبايەۆ جاڭا بيۋجەت كودەكسى اياسىندا وڭىرلىك ستاندارتتار جۇيەسىن ءتۇسىندىرۋ بويىنشا مينيسترلىكتەرمەن، وبلىستىق جانە قالالىق اكىمدىكتەرمەن كەڭەس وتكىزدى.
وڭىرلىك ستاندارتتار جۇيەسى (ءو س ج) - رەسپۋبليكالىق ماڭىزى بار قالالاردان باستاپ اۋىلدارعا دەيىنگى ەلدى مەكەن تۇرعىندارىنا الەۋمەتتىك جانە ينجەنەرلىك-كولىك ينفراقۇرىلىمى نىساندارى مەن قىزمەتتەرىمەن قامتاماسىز ەتىلۋى ءتيىس نەگىزگى ءتىزىم.
حالىقتىڭ ءومىر ءسۇرۋ ساپاسىن تەڭەستىرۋ ماقساتىندا ءۇش جىلدىق كەزەڭگە ارنالعان جالپى سيپاتتاعى ترانسفەرتتەردى قالىپتاستىرۋ كەزىندە ءو س ج- ءنىڭ 12 باعىتى بويىنشا قامتاماسىز ەتىلۋ دەڭگەيى ەسكەرىلەدى: ءبىلىم بەرۋ، دەنساۋلىق ساقتاۋ، الەۋمەتتىك قامسىزداندىرۋ، ينجەنەرلىك ينفراقۇرىلىم، كولىك ينفراقۇرىلىمى، جول ينفراقۇرىلىمى، مادەنيەت جانە سپورت، قاۋىپسىزدىك پەن قورشاعان ورتانى قورعاۋ، اقپاراتتىق-كوممۋنيكاتسيالىق جۇيە، تۇرمىستىق قىزمەت كورسەتۋ ينفراقۇرىلىمى، قىزمەتتەر ينفراقۇرىلىمى، بوس ۋاقىت پەن دەمالىس.
وسىلايشا، ءو س ج وڭىرلەر اراسىنداعى جانە ءوڭىر ىشىندەگى ينفراقۇرىلىمعا قولجەتىمدىلىك تەڭسىزدىگىن ازايتۋعا، ەلدى مەكەندەردىڭ دامۋىن ءتيىمدى جوسپارلاۋعا جانە بيۋجەت قاراجاتىن ءادىل بولۋگە مۇمكىندىك بەرەدى.
- نەگىزگى نازار ءوسج كورسەتكىشتەرى بويىنشا قامتاماسىز ەتىلۋ دەڭگەيى ەڭ تومەن ەلدى مەكەندەرگە اۋدارىلادى. بۇل جوبالار ءبىرىنشى كەزەكتە قارجىلاندىرىلادى. ياعني جاعدايى ناشار وڭىرلەرگە كوبىرەك قارجى بولىنەدى، ال جاعدايى جاقسى وڭىرلەرگە ازىراق. مۇنى بارلىق ءوڭىر جاقسى ءتۇسىنۋى كەرەك، - دەدى وڭىرلىك دامۋ ماسەلەلەرىن قاداعالايتىن قانات بوزىمبايەۆ.
ەلدى مەكەندەردىڭ ينفراقۇرىلىممەن قامتاماسىز ەتىلۋى بويىنشا ەڭ جوعارى كورسەتكىش الماتى قالاسىندا (%90,9)، ال ەڭ تومەن كورسەتكىش اباي (%58,1) جانە ۇلىتاۋ (%55,3) وبلىستارىندا تىركەلدى. مونيتورينگ ناتيجەسى بويىنشا بۇل ەكى وڭىردە بازالىق ينفراقۇرىلىممەن قامتاماسىز ەتىلۋ دەڭگەيى تومەن. وسىعان بايلانىستى قانات بوزىمبايەۆ ۇلىتاۋ جانە اباي وبلىستارىنىڭ اكىمدىكتەرىنە ءو س ج اياسىندا الشاقتىقتاردى قىسقارتۋ بويىنشا شارالار قابىلداۋدى تاپسىردى.
سونداي-اق ۆيتسە-پرەمەر سالالىق مەملەكەتتىك ورگاندارعا، سونداي-اق استانا، الماتى، شىمكەنت قالالارى مەن وبلىستاردىڭ اكىمدىكتەرىنە وڭىرلىك ستاندارتتار جۇيەسىن جەرگىلىكتى دەڭگەيدە ەنگىزۋگە بايلانىستى بارلىق بيۋروكراتيالىق ۇدەرىستى جەدەلدەتۋدى تاپسىردى.
ايتا كەتەيىك، قانات بوزىمبايەۆ «ەنەرگەتيكا جانە كوممۋنالدىق سەكتورلاردى جاڭعىرتۋ» ۇلتتىق جوباسىن جۇزەگە اسىرۋ بارىسىن تەكسەردى.
