وڭتۇستىكتەن سولتۇستىككە كوشۋ: قوستانايدا دارىگەرلەر تاپشىلىعى ازايدى

استانا. KAZINFORM - قوستاناي وبلىسىندا دارىگەر مامانداردىڭ تاپشىلىعى ايتارلىقتاي ازايدى. ونىڭ سەبەبىن ءوڭىر اكىمى قۇمار اقساقالوۆ ءتۇسىندىردى.

- «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2023 -جىلدان 2025 -جىلعا دەيىنگى كەزەڭگە جوسپارلانعان 25 العاشقى مەديتسينالىق-سانيتارلىق كومەك نىساندارىنىڭ قۇرىلىسى اياقتالدى. ەرەكشە قاجەتتىلىكتەرى بار بالالاردى وڭالتۋ ءۇشىن بيىل وبلىستا اۋتيزم جانە باسقا دا اقىل-وي كەمىستىگى بار بالالارعا ارنالعان العاشقى ورتالىق اشىلدى. قازىر 30 دەنساۋلىق ساقتاۋ مەكەمەسىندە 2,3 ميلليارد تەڭگەگە جوندەۋ جۇمىستارى جۇرگىزىلىپ جاتىر، - دەدى قۇمار اقساقالوۆ ءوڭىردىڭ الەۋمەتتىك-ەكونوميكالىق دامۋى تۋرالى ەسەپ بەرە تۇرىپ.

وبلىس اكىمىنىڭ مالىمەتىنە سۇيەنسەك، وڭىردەگى دەنساۋلىق ساقتاۋ نىساندارىنىڭ ماتەريالدىق- تەحنيكالىق بازاسىن جاقسارتۋعا 4,6 ميلليارد تەڭگە ءبولىندى.

- بيىل قازاننان باستاپ وبلىستىڭ وڭتۇستىك وڭىرلەرىنىڭ دارىگەرلەرى ءۇشىن كوتەرمە جاردەماقى 5 ميلليون تەڭگەگە دەيىن، ال اۋىلدا 7 ميلليون تەڭگەگە دەيىن ۇلعايدى. وڭتۇستىك وڭىرلەردەن كوشىپ كەلگەن دارىگەرلەرگە كورسەتىلەتىن الەۋمەتتىك قولداۋدىڭ ارقاسىندا وبلىستا مامان تاپشىلىعى 99 مامانعا ازايدى. وسىلايشا دەنساۋلىق ساقتاۋ كورسەتكىشتەرىنىڭ ديناميكاسىنا وڭ اسەر ەتتى. ماسەلەن، وتكەن جىلمەن سالىستىرعاندا ءولىم-ءجىتىم %7,7 عا، نارەستە ءولىمى %2,2 عا ازايدى. سونداي-اق ونكولوگيالىق، تۋبەركۋلەزدەن، قان اينالىمى جۇيەسى اۋرۋلارىنان جانە جاراقاتتانۋدان بولاتىن ءولىم- ءجىتىم تومەندەدى، - دەيدى ول.

بۇعان دەيىن قۇمار اقساقالوۆ قوستاناي وبلىسىندا كەدەي تۇراتىن حالىقتىڭ ازايعانىن ايتقان ەدى.

اۆتور

داۋلەت ىزتىلەۋ