وڭتۇستىكتەن سولتۇستىككە كوشۋ: قونىس اۋدارۋ قارقىنى قالاي
استانا. KAZINFORM - ەلىمىزدىڭ 2023-2027 -جىلدارعا ارنالعان كوشى-قون ساياساتىنىڭ تۇجىرىمداماسى %83 پايىزعا ورىندالدى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ءمالىم ەتتى.

- سوڭعى جىلدارى ىشكى ەڭبەك ۇتقىرلىعىندا ىسكەرلىك بەلسەندىلىك بايقالىپ وتىر. ەرىكتى قونىس اۋدارۋ اياسىندا 2022 -جىلدان بەرى جۇمىس كۇشى ارتىق ايماقتاردان جۇمىس كۇشى تاپشى وڭىرلەرگە 28 مىڭعا جۋىق ادام قونىستاندى. تۇتاستاي العاندا، قونىس اۋدارعان وڭىرلەردەن كەرى قايتۋ كورسەتكىشى 4 ەسە ازايدى. تۋعان ولكەگە قايتا قونىس اۋدارۋ 2019 -جىلى 53 مىڭ ادامنان 2024 -جىلى 13 مىڭ ادامعا دەيىن ازايدى. سونداي-اق قونىس اۋدارۋشىلار مەن قانداستاردى بەيىمدەۋ جانە ينتەگراتسيالاۋ بويىنشا قابىلدانعان شارالار سولتۇستىككە كوشىپ بارعان ازاماتتاردىڭ وڭىردەن قايتا كەتۋ دەڭگەيىن نولگە دەيىن تومەندەتۋگە ىقپال ەتتى، - دەدى سۆەتلانا جاقىپوۆا ۇكىمەت وتىرىسىندا.
ودان بولەك مينيستر ەلدەگى كوشى-قون پروتسەسىندە قيىندىقتار بارىن ايتتى.
- گەوساياسي تۇراقسىزدىق، سولتۇستىك جانە باتىس ايماقتارداعى ترانسشەكارالىق كوشى-قون قىسىمى جانە قازاقستاندى ترانزيتتىك اۋماق رەتىندە پايدالانۋ جاعدايى بار. سونىمەن قاتار دەموگرافيالىق ءوسىم، حالىقتىڭ سولتۇستىك جانە شىعىس وڭىرلەردەن كوشىپ كەتۋى، ۋربانيزاتسيا جانە مەگاپوليستەرگە شامادان تىس قونىستانۋدان تۋىنداعان ماسەلەلەر بار، - دەيدى ۆەدومستۆو باسشىسى.
ەسكە سالا كەتسەك، بىلتىر كۇزدە وڭتۇستىكتەن سولتۇستىككە كوشكىسى كەلەتىندەر قاتارى كوبەيىپ جاتقانى تۋرالى حابارلاعان ەدىك.
ايتا كەتسەك، بىلتىر وڭتۇستىكتەن سولتۇستىككە قونىس اۋدارۋ ساياساتىن ىسكە اسىرۋ بارىسىندا 1 ميلليارد تەڭگەدەن استام قاراجات جىمقىرىلعانى انىقتالدى.
اۆتور
داۋلەت ىزتىلەۋ