وڭتۇستىك كورەيانىڭ ەكس-پرەزيدەنتى سايلاۋ الدىندا پارتيادان كەتتى
استانا. KAZINFORM - وڭتۇستىك كورەيانىڭ قىزمەتىنەن شەتتەتىلگەن پرەزيدەنتى يۋن سوك يەل 3-ماۋسىمداعى كەزەكتەن تىس پرەزيدەنتتىك سايلاۋ قارساڭىندا بيلەۋشى پارتيادان شىعاتىنىن مالىمدەدى، دەپ جازادى سينحۋا.
- بۇگىن مەن «ازاماتتىق كۇش» پارتياسىنان شىعامىن. ماعان سەنىپ، ۇزاق ۋاقىت بويى جانىمدا بولعان سەرىكتەرىمنىڭ الدىندا باس يەمىن، - دەدى ءول وزىنىڭ ونلاين مالىمدەمەسىندە.
يۋن سوك يەل پارتيادان كەتۋىن — الداعى پرەزيدەنتتىك سايلاۋدا پارتيا كانديداتىنىڭ جەڭىسىن قامتاماسىز ەتۋدىڭ جانە ەلدەگى ليبەرالدىق دەموكراتيانى قورعاۋدىڭ ەڭ ءتيىمدى جولى دەپ ەسەپتەيتىنىن ايتتى.
سوڭعى ۋاقىتتا يۋن سوك يەلگە پارتيادان كەتۋگە شاقىرعان ۇندەۋلەر كۇشەيگەن بولاتىن. بۇل قادام، اسىرەسە، داۋىس بەرۋگە شەشىم قابىلداي الماي جۇرگەن ەلەكتوراتتىڭ قولداۋىنا ءۇمىت ارتۋ ءۇشىن ۇسىنىلدى. بيلەۋشى پارتيانىڭ بەدەلىنىڭ تۇسۋىنە يۋن سوك يەلدىڭ ەلدە اسكەري جاعداي ەنگىزۋى، كەيىن يمپيچمەنتكە ۇشىراپ، پرەزيدەنتتىك قىزمەتتەن تولىق شەتتەتىلۋى سەبەپ بولدى.
ەكس-پرەزيدەنت ازاماتتاردى 3- ماۋسىمداعى سايلاۋدا «ازاماتتىق كۇش» بيلەۋشى كونسەرۆاتيۆتىك پارتياسىنان ۇسىنىلعان كانديدات كيم مۋن سۋدى قولداۋعا شاقىرىپ، بوستاندىقتى، ەگەمەندىكتى جانە وركەندەۋدى قورعاۋ ءۇشىن كۇش بىرىكتىرۋگە ۇندەدى.
ەسكە سالايىق، 4 -ءساۋىر كۇنى كونستيتۋتسيالىق سوت بۇرىنعى پرەزيدەنت يۋن سوك يەلدى بيلىكتەن ءبىر اۋىزدان شەتتەتتى. بۇل شەشىم اسكەري توتەنشە جاعدايعا بايلانىستى وقيعالار نەگىزىندە قابىلداندى جانە پارلامەنتتىڭ بەس ايىبىنىڭ بارلىعىنا سوت كەلىسىم بەردى. پرەزيدەنت قىزمەتىنەن شەتتەتىلگەن ساتتەن باستاپ 60 كۇن ىشىندە كەزەكتەن تىس سايلاۋ ءوتۋى ءتيىس. بۇل سايلاۋدا باستى ۇمىتكەر - 2022 -جىلى يۋن سوك يەلدەن از عانا ايىرماشىلىقپەن جەڭىلگەن وپپوزيتسيا جەتەكشىسى لي چجە ميەن سانالادى. بۇعان دەيىن ساراپشىلار داۋىس بەرۋ ەڭ كوپ دەگەندە 60 كۇن ىشىندە ۇيىمداستىرىلادى دەپ بولجاعان ەدى، بۇل ساياساتكەرلەرگە دايىندالۋعا ۋاقىت بەرەدى.
كورەيا رەسپۋبليكاسى بيلىگى كەزەكتەن تىس پرەزيدەنتتىك سايلاۋدى 3- ماۋسىمعا بەلگىلەۋدى جوسپارلاپ وتىر.
